Një sulm i armatosur ndaj aeroportit më të madh të Nigerit të enjten la pas 35 viktima, në atë që cilësohet si goditja e dytë kundër këtij objekti strategjik në më pak se pesë muaj.
Pranë aeroportit ndërkombëtar Diori Hamani, banorët e Niamey-t dëgjuan shpërthime dhe të shtëna armësh menjëherë pasi kishin mbaruar lutjet e mëngjesit.
Të lidhura
None found
Një prej banorëve të zonës afër aeroportit, Lawalli Tsalha, tregoi se zhurmat e shpërthimeve nisën sapo përfunduan lutjet.
“E përfunduam lutjen rreth orës 05:50 dhe pak më vonë dëgjuam një zhurmë të fortë, sikur diçka të kishte shpërthyer. Vetëm pak minuta më pas kuptuam se çfarë po ndodhte”, tha ai.
Ministria e Mbrojtjes e Nigerit bëri të ditur se mes të vrarëve janë 22 sulmues, 11 ushtarë dhe 2 civilë.
Më vonë gjatë ditës, përgjegjësinë për sulmin e mori grupi xhihadist Jama’at Nusrat al-Islam wal-Muslimin, i cili është i lidhur me Al-Kaedën.
Autoritetet deklaruan se situata ishte vënë nën kontroll gjatë orëve të paradites, ndërsa forcat e sigurisë filluan operacione për të identifikuar dhe kapur çdo sulmues që mund të kishte mbetur.
Nigeri prej më shumë se një dekade është përballur me një kryengritje islamiste. Në janar të këtij viti, përgjegjësinë për një tjetër sulm ndaj të njëjtit aeroport e mori një grup i lidhur me të ashtuquajturin Shteti Islamik.
Aeroporti Diori Hamani ndodhet pranë një baze ushtarake dhe konsiderohet një objekt me rëndësi të lartë strategjike për sigurinë e vendit.
