Në Pallatin e Kulturës në Tetovë, familjarë, miq dhe njerëz të artit u mblodhën sot për t’i dhënë lamtumirën e fundit këngëtarit të njohur Shpat Kasapi.
Artisti u nda papritur nga jeta më 26 Nëntor në Itali ku ndodhej së bashku me partneren, Selvije Jao dhe të birin. Dyshohet se këngëtari pësoi arrest kardiak dhe s’mundi të mbijetonte.
Mes dhimbjes vëmendjen e të gjithëve e tërhoqi motra e tij, Jehona, e cila nuk mundi të përmbante lotët gjatë fjalës së saj prekëse.
E thyer nga humbja, Jehona kujtoi vëllanë si një njeri të butë, me zemër të madhe dhe plot dashuri për fëmijët e të moshuarit. Ajo u ndal edhe te amaneti i fundit i Shpatit djalin e tij të vogël Roelin, duke premtuar se do ta përmbushë me përkushtim.
“Amanetin tëndë Roelin, do ta shoh si sytë e ballit”, u shpreh ajo.
Jehona Kasapi: Sot me zemër të thyer jemi mbledhur për t’i dhënë lamtumirën e fundit vëllait tim, është shumë e vështirë për të përshkruar fjalët për të përshkruar dhimbjet që ndiej.
Shpat, shpirti i motrës, ti linde me yll në ballë, ishe një njeri i mirë, dije t’i ndieje hallet nga empatia jote e madhe. Ishe një njeri i mirë me zemër të bardhë dhe fisnik.
Shpati, ti i doje shumë fëmijët dhe pleqtë. Doje shumë të qeshësh, buzëqeshja ishte sinonim i yti. Është e rëndë të pranojmë se nuk do dëgjojmë zërin tënd, por ti do të mbetesh gjithmonë në zemrën. Ti do të mbetesh dritë në familjen tonë. Amanetin tëndë Roelin, do ta shoh si sytë e ballit.
