Qindra qytetarë janë mbledhur sot në Tiranë, për të marrë pjesë në protestën e thirrur nga opozita.
Protestuesit janë mbledhur para selisë së PD-së, në pritje të daljes së kryetarit të opozitës, Sali Berisha, për t’iu bashkuar protestës para Kryeministrisë.
Ndërkohë mësohet se mbi 1500 forca policie janë angazhuar në terren për të siguruar mbarëvajtjen e protestës.
Gjithashtu, Gjykata pritet të japë sot edhe vendimin për vulën e Partisë Demokratike. Megjithatë, kreu i PD Sali Berisha, ka thënë vazhdimisht se protesta nuk është e lidhur me këtë çështje, por është kundër qeverisë dhe problemeve që kanë përfshirë vendin.
Policia e Shtetit ka bërë të ditur se nga ora 10:00 do të bllokohen disa rrugë deri në përfundim të tubimit.
Rrugët ku do të bllokohet qarkullimi: Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, nga kryqëzimi i Rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D’Ark” dhe bulevardi “Bajram Curri”, nga kryqëzimi i Rrugës së Elbasanit me rrugën “Ibrahim Rugova”.
/albeu.com/
