Deputetja e Partisë Demokratike, Jorida Tabaku, në një deklaratë për media nga kryesia e Kuvendit është shprehur se do ta çojnë Buxhetin në Gjykatë Kushtetuese, pasi sipas saj qeveria me arrogancë po e diskuton atë, në një kohë që ende nuk kanë kaluar ligjet fiskale.
Tabaku ka kërkuar ripërsëritjen e mbledhjes së komisionit të Ekonomisë.
“Të premten është prezantuar buxheti pa i miratuar e kaluar në qeveri ligjet që tregojnë si do jenë taksat e shqiptarëve vitin e ardhshëm. Në një vit krize, qeveria ka aq arrogancë sa nuk përfill Parlamentin e shkel ligjin duke mos i sjellë këto dokumentet në Parlament.
Qeveria nuk ka miratuar ligjet fiskale e miratojnë buxhetin. Deputetët nuk mund të trajtohen si noterë e të shpërfillet puna e tyre.
Sot qeveria ka sjellë një buxhet ku të ardhurat do rriten me rreth 10% e një pjesë e madhe parashikon të vijnë nga ligji për bastet që nuk ka ardhur në Parlament.
130 mln euro taksa të rritura që qeveria nuk ka sjellë ligjet në Kuvend e nuk i ka miratuar akoma.
Kjo që po ndodh në Komisionin e Ekonomisë është anti Kushtetuese. Nëse mbledhja nuk anulohet e nuk përsëritet do çojmë buxhetin në Gjykatë Kushtetuese.
Nuk mundet në një vit kaq të vështirë krize qeveria të jetë kaq arrogante sa ta marrë për të mirëqenë punën e deputetëve, nuk ka ndodhur asnjëherë që kur kam hyrë në parlament që buxheti të diskutohet pa ligjet fiskale. E thonë një sërë ligjesh e rregullash që i japin vlerë parlamentit për të diskutuar buxhetin, kjo shkelje është një nga arsyet që qeveria e konsideron atë si një vartës të tij. Në jemi këtu për të diskutuar ligjet fiskale dhe buxhetin, për të parë si qeveria do rrisë taksat, por nuk mund të miratohen ligje që nuk janë depozituar, i bëj thirrje kryetares së kuvendit që ta quajë të paligjshme mbledhjen e Kuvendit për buxhetin”, tha Tabaku.
