Kryedemokrati, Lulzim Basha, nëëpermjet një postimi në rrjetin social “Facebook” i ka uruar Kosovës 14-vjetorin e Pavarësisë.
Basha shprehet se kjo ditë është fatlume për të gjithë shqiptarët në mbarë botën.
Më pas ai shkruan se edhe në këto kohë sfiduese është krenar për arritjet dhe shpresëplotë për të ardhmen e Kosovës, më të cilën do të ecim vllazërisht përpara, drejt Evropës.
Postimi i plotë i Lulzim Bashës:
Gëzuar Pavarësinë Kosovë! Gëzuar këtë ditë fatlume shqiptarëve kudo në botë.
Në përvjetorin e 14-të të shtetit të Kosovës, përulemi me nderim dhe mirënjohje para Presidentit Ibrahim Rugova, Komandantit Legjendar Adem Jashari, luftëtarëve të Ushtrisë Çlirimtare të Kosovës, veprimtarëve, patriotëve, bijëve dhe bijave të kombit tonë që kanë kryer sakrificën më sublime për pavarësinë.
Kjo ëndërr e bukur lirie, është sot demokracia më e gjallë e rajonit që, pavarësisht vështirësive, gëzon tashmë rrënjët e forta të një shteti me institucione të konsoliduara dhe stabilitet politik, i cili punon me vullnet dhe përkushtim të jashtëzakonshëm për integrimin euroatlantik.
Edhe në këto kohë sfiduese, jam krenar për arritjet e deritanishme dhe shpresëplotë për të ardhmen e Kosovës, me të cilën do të ecim vllazërisht përpara, drejt fatit tonë europian.
Gëzuar Kosovë e dashur! /albeu.com
