Kryeministri Albin Kurti është shprehur se ata që qeverisën për vite të tëra duhet të shohin veten në pasqyrë para se të flasin për qeverinë aktuale që ka vetëm 9 muaj në pushtet.
Komentet Kurti i bëri në mbledhjen e 50-të të qeverisë së Kosovës.
Kurti tha se ndonëse vendi ndodhet në krizë të vështirë energjetike po bëhet gjithçka është e mundur që të dilet sa më lehtë nga situata.
“Ndonëse ndodhemi në një krizë të vështirë energjetike po bëjmë gjithë çfarë mundemi e krejt çka dimë që të dalim me sa më pak humbje e dëme prej saj, ndërkaq ata që për dështimet e tyre për dekada kërkojnë llogari nga ne që sot shënojmë 9 muaj në qeveri duhet më parë ta shohin vetën në pasqyrë. Zëri i tyre i lartë i propagandës nuk duhet ta turbullojë zërin tonë të arsyes”, tha ai.
Kryeministri i Kosovës foli për punën e qeverisë që drejton këto 9 muaj.
“Si kurrë më parë ekonomia jonë është kthyer drejt zhvillimit, para gjashtë ditësh është votuar buxheti më i madh në histori.Eksportet kosovare deri në tetor 2021 janë në vlerë të 614 milionë euro investimet e huaja direkte në vitin 2021 janë 388.9 milionë euro që përbën 80% ngritje. Kemi regjistruar mbi 10 mijë vende të reja të punës”, tha ai ndër të tjera./albeu.com/
