Gjatë vizitës zyrtare në Portugali, ministrja Mimoza Kusari u takua sot në Parlamentin portugez me kryetarin e Grupit të Miqësisë Portugali–Kosovë, Bruno Vitorino, dhe deputetët Edite Estrela, Jose Dotti e Miguel Costa Matos, shkruan “Bota sot”. Në takim u trajtua forcimi i marrëdhënieve politike, ekonomike dhe institucionale mes dy vendeve.
Sipas Kusarit, biseda u përqendrua edhe te shkëmbimi i përvojave institucionale dhe mbështetja e Portugalisë për integrimin evropian të Kosovës. Një temë e rëndësishme ishte përkrahja portugeze për anëtarësimin e Kosovës në organizata dhe institucione ndërkombëtare, përfshirë Këshillin e Evropës.
Të lidhura
None found
Në fushën ekonomike, palët diskutuan mundësinë e organizimit të Forumit të Biznesit Kosovë–Portugali në Prishtinë vitin e ardhshëm, si dhe nënshkrimin e një Marrëveshjeje Bilaterale për Bashkëpunim Ekonomik.
Kusari bëri të ditur se u shqyrtua edhe vendosja e një linje të drejtpërdrejtë ajrore mes Kosovës dhe Portugalisë, e cila do të lehtësonte lidhjet mes tyre dhe do të ndihmonte zhvillimin e turizmit. Në takim u theksua gjithashtu rëndësia e zgjerimit të bashkëpunimit në industrinë e mbrojtjes dhe në teknologjinë e informacionit.
Sipas ministres, këto nisma synojnë t’i njohin kompanitë portugeze me tregun dhe potencialin e Kosovës, ndërsa bizneseve kosovare t’u krijojnë mundësi të reja për të hyrë në tregun portugez. Ajo shprehu bindjen se të dy vendet kanë shumë për t’i ofruar njëri-tjetrit dhe se lidhjet më të forta politike, institucionale e ekonomike do të hapin mundësi të reja për Kosovën dhe Portugalinë.
