Sipas një mediumi spanjoll, Mauricio Pochettino ka arritur marrëveshje paraprake me drejtuesit e Manchester Unitedit për të zëvendësuar Michael Carrickun si trajner i klubit anglez.
Marrja e drejtimit të skuadrës në “Old Trafford” nga trajneri argjentinas varet, megjithatë, nga afrimi i dy lojtarëve gjatë afatit kalimtar të janarit: një qendërmbrojtësi dhe një sulmuesi qendror.
Të lidhura
None found
Një tjetër kusht për realizimin e marrëveshjes është pagesa e klauzolës së largimit prej 10 milionë dollarësh ndaj Federatës së Futbollit të Shteteve të Bashkuara. Pas rinovimit të fundit, kontrata e Pochettinos me federatën është e vlefshme deri në Kupën e Botës 2030.
Pochettino synon ta nisë riorganizimin e Manchester Unitedit nga mbrojtja. Sipas raportimit, skuadra ndodhet në zonën e rënies nga liga, pasi ka marrë vetëm një fitore në dhjetë ndeshjet e para të Ligës Premier. Ky është fillimi më i dobët i klubit në kampionat në katër dekada.
Për të forcuar prapavijën, trajneri argjentinas u ka kërkuar drejtuesve një qendërmbrojtës që mund të japë siguri menjëherë dhe të ndihmojë në stabilizimin e saj.
Edhe sulmi ka nevojë për përforcim, për shkak të lëndimit afatgjatë të sulmuesit slloven Benjamin Sesko.
Me pak alternativa për zonën kundërshtare, Pochettino ka vënë në shënjestër Folarin Balogun. Ai e njeh sulmuesin nga puna e përbashkët gjatë kohës kur drejtonte Kombëtaren e Shteteve të Bashkuara.
Drejtuesit e Manchester Unitedit, ndërkohë, po punojnë për të kryer pagesën prej 10 milionë dollarësh ndaj federatës amerikane.
Aktualisht, Pochettino është i angazhuar me Kombëtaren e SHBA-së, e cila po përgatitet për çerekfinalet e Ligës së Kombeve të CONCACAF-it kundër Haitit.
Sipas raportimit, përfaqësuesit e Manchester Unitedit pritet të përshpejtojnë procedurat për largimin e trajnerit argjentinas dhe, gjatë javëve të ardhshme, të kontaktojnë përfaqësuesit e Folarin Balogun.
