Jared Kushner dhe Steve Witkoff, të dërguarit e presidentit amerikan Donald Trump, do të udhëtojnë drejt Moskës për t’u takuar me presidentin rus Vladimir Putin. Vizita zhvillohet pas bisedimeve në Abu Dhabi mes delegacioneve të Rusisë, Ukrainës dhe Shteteve të Bashkuara, të cilat përfunduan pa një marrëveshje konkrete për ndalimin e luftës.
Jared Kushner njoftoi për udhëtimin gjatë një konference për shtyp të mbajtur të mërkurën në kryeqytetin e Emirateve të Bashkuara Arabe.
Të lidhura
None found
“Steve dhe unë do të udhëtojmë nesër drejt Moskës për t’u takuar me presidentin Putin, për të shqyrtuar atë që u diskutua sot dhe për të bërë përpjekje për më shumë përparim në disa nga çështjet që trajtuam, pasi shohim disa mundësi dhe hapësira për përparim”, deklaroi dhëndri i presidentit amerikan.
Takimi në Moskë do të zhvillohet pas dy ditësh negociatash mes përfaqësuesve rusë, ukrainas dhe amerikanë. Ky ishte kontakti i parë në këtë format që nga muaji shkurt, ndërsa administrata Trump ka shtuar përpjekjet diplomatike për t’i dhënë fund konfliktit në Ukrainë, i cili po i afrohet vitit të pestë.
Bisedimet e së mërkurës zgjatën më pak se dy orë dhe nuk dhanë sinjale se Rusia kishte ndryshuar qëndrimin për kërkesat e saj kryesore. Vladimir Medinsky, negociatori kryesor rus, tha se ishte arritur mirëkuptim për disa pika, por jo për të gjitha çështjet.
“Në disa fusha arritëm një mirëkuptim të përbashkët. Në të tjera, jo. Kjo bisedë, pa dyshim, do të vazhdojë”, u shpreh Medinsky.
Kushner bëri të ditur se në takimet e ardhshme do të synohet përmbyllja e marrëveshjeve për ndihmën humanitare dhe shkëmbimin e të burgosurve. Në diskutime pritet të trajtohet edhe përfshirja e vendeve europiane, një format që Moska deri tani e ka kundërshtuar.
Pas vizitës në Moskë, Kushner dhe Witkoff pritet të shkojnë në Dublin, ku do të takojnë presidentin ukrainas Volodymyr Zelensky për të shqyrtuar propozimet e diskutuara në Abu Dhabi.
Presidenti ukrainas vlerësoi rolin e Shteteve të Bashkuara në organizimin e negociatave dhe njoftoi se ato kishin sjellë një “marrëveshje të rëndësishme humanitare” për një shkëmbim të ri të të burgosurve.
“Palët diskutuan pikëpamjet e tyre për garancitë e sigurisë dhe hapi i parë duhet të jetë përfundimi i kësaj lufte dhe garantimi i sigurisë së Ukrainës. Diskutuam edhe formate më të gjera për vijimin e punës, me përfshirjen e partnerëve evropianë”, shkroi Zelensky në Telegram.
Rustem Umerov, kreu i shërbimit të inteligjencës së jashtme të Ukrainës dhe negociatori kryesor i Kievit, tha se kishte pasur përparim në disa fusha, mes tyre edhe në çështjet e sigurisë. Megjithatë, ai paralajmëroi se mes palëve vazhdojnë të ekzistojnë “dallime të konsiderueshme”.
Davyd Arakhamia, një tjetër anëtar i delegacionit ukrainas, deklaroi se përfaqësuesit rusë ishin paraqitur në tryezën e negociatave me “udhëzime shumë të rrepta”.
“Jam pjesë e këtij procesi që prej vitit 2022 dhe mund të them me bindje se kjo ishte një nga rundet më të vështira”, deklaroi Arakhamia.
Ndërkohë, gjatë kësaj jave, përfaqësues europianë kanë zhvilluar takime të veçanta në Abu Dhabi me negociatorët ukrainas dhe amerikanë.
Një javë më parë, Trump foli për një marrëveshje të re sigurie për Ukrainën, e cila sipas tij “mund të përfshijë të gjithë Europën”. Pas kësaj deklarate, zyrtarët europianë përsëritën kërkesën që vendet e tyre të kenë rol më të madh në procesin e negociatave për paqen.
Moska vazhdon të kundërshtojë pjesëmarrjen e drejtpërdrejtë të përfaqësuesve europianë. Ministri i Jashtëm rus, Sergey Lavrov, e kritikoi praninë e zyrtarëve europianë në Abu Dhabi, duke e përshkruar atë si një “qasje jo premtuese”.
I pyetur nëse në qytetin e Emirateve kishte pasur kontakte mes përfaqësuesve rusë dhe atyre të Bashkimit Europian, zëdhënësi i Kremlinit, Dmitry Peskov, tha: “Asnjë kontakt i tillë nuk ishte planifikuar dhe as nuk ndodhi”.
Sekretari amerikan i Shtetit, Marco Rubio, deklaroi të martën në Paris, gjatë një takimi të G7, se Uashingtoni synon zgjerimin e formatit të bisedimeve, në mënyrë që evropianët të “përfaqësohen drejtpërdrejt në atë tryezë”.
Ukraina ka kërkuar prej kohësh që vendet europiane të marrin pjesë në tryezën kryesore të negociatave.
“Ne besojmë se Europa duhet të përfaqësohet në të gjitha fazat e diplomacisë thelbësore”, deklaroi Zelensky të mërkurën.
Takimi i pritshëm në Moskë mes Vladimir Putinit dhe të dërguarve të Donald Trump shihet si një tjetër përpjekje për të zhbllokuar çështjet që vijojnë të pengojnë arritjen e një marrëveshjeje për përfundimin e luftës në Ukrainë.
