Guvernatori i Bankës Popullore, Trajko Sllaveski, deklaroi se Alta Banka ka nivel të lartë likuiditeti, ndërsa kreditë me probleme zënë 2.9 përqind të portofolit të saj kreditor.
Sipas tij, kapitalizimi i bankës arrin në gati 26 përqind, duke qenë ndjeshëm mbi kufirin ligjor prej 8 përqind dhe mbi nivelin nën 2 përqind, i cili do të nënkuptonte falimentim. Sllaveski tha se administrimi i vendosur synon të mbrojë gjendjen financiare të bankës, ndërkohë që Banka Kombëtare po punon për gjetjen e një pronari të ri.
Të lidhura
None found
Ai sqaroi se më 1 nëntor, Bordi Ekzekutiv i Bankës Popullore vendosi administrimin e “Alta Banka SHA Bitola”, pas zhvillimeve të ndodhura në Serbi. Revokimi i licencës së operimit të “Alta Banka Belgrade”, gjatë natës së 30-31 tetorit 2026, nënkuptoi se pronari nuk ishte më në gjendje të përmbushte detyrimet e tij. Për pasojë, u hoq edhe pëlqimi për blerjen e aksioneve në bankën e Manastirit, si dhe e drejta e votës.
Guvernatori rikujtoi se deri një vit më parë institucioni bankar mbante emrin “Stopanska Banka SHA Bitola”. Ai vlerësoi se struktura e pronësisë dhe qeverisja e dobët korporative kishin krijuar rreziqe të konsiderueshme, ndërsa mbështetja nga aksionari i vetëm ishte praktikisht e pamundur.
Si mënyrën më të përshtatshme për përballimin e këtij rreziku, Sllaveski përmendi përfshirjen e një investitori strategjik, veçanërisht të një institucioni financiar që do të sillte administrim më efikas dhe riorganizim të veprimtarisë.
Ai shtoi se më herët Banka Popullore kishte miratuar kërkesën e një banke të madhe dhe të qëndrueshme vendase për blerjen e aksioneve në institucionin që në atë kohë quhej “Stopanska Banka SHA Bitola”.
