Dialogu me Bullgarinë do të vazhdojë, ndërsa Maqedonia po bisedon edhe me përfaqësues të Bashkimit Evropian dhe të vendeve anëtare për çështjet e integrimit evropian. Ministri i Punëve të Jashtme, Timço Mucunski, tha se vendimet për këtë proces kërkojnë konsensus.
Duke iu përgjigjur pyetjes nëse ishte takuar sërish me homologun bullgar pas incidentit me arratisjen e Iva Mihailovës, Mucunski u shpreh se do të tregohet i kujdesshëm në deklarata. Sipas tij, Maqedonia nuk dëshiron të përfshihet në skenën politike rreth kësaj teme, sidomos gjatë zgjedhjeve presidenciale në Bullgari.
Të lidhura
None found
Deklaratat u bënë sot pas takimit të Mucunskit me ministrin e Jashtëm sllovak Juraj Blanar, i cili po zhvillon një vizitë zyrtare në Shkup. Mucunski tha se Maqedonia pret nga anëtarët e BE-së respektimin e standardeve më të larta të sundimit të ligjit dhe e quajti të papranueshme që Bullgaria të shërbejë si strehë për persona të dënuar ose për persona ndaj të cilëve zhvillohen procedura ligjore.
Ministri tha se vendi po vijon përpjekjet për një zgjidhje të qëndrueshme që do të mundësonte përparimin e integrimit evropian. Ai njoftoi se ditët e fundit janë zhvilluar takime të rëndësishme të nivelit më të lartë, mes tyre edhe një takim në Mal të Zi me ministrin francez për Çështjet Evropiane, të cilit ia ka paraqitur drejtpërdrejt qëndrimet e vendit.
Zhbllokimi i procesit eurointegrues ishte gjithashtu ndër temat kryesore të bisedës së sotme me Juraj Blanarin. Mucunski theksoi se vendimet për zgjerimin dhe integrimin kanë peshë të jashtëzakonshme dhe kërkojnë konsensus të plotë në Bruksel.
Sipas tij, çdo marrëveshje e mundshme me Bullgarinë, nëse përputhet me qëndrimet e Maqedonisë, duhet të sigurojë mbështetje dhe konsensus brenda BE-së. Ai përsëriti se rruga evropiane e vendit nuk ka alternativë dhe se Qeveria do të vazhdojë të punojë për këtë çështje.
