Pas humbjeve radhazi ndaj Paris Saint-Germainit dhe Real Madridit, Hansi Flick po përpiqet të rikthejë moralin dhe kohezionin te Barcelona, raporton Mundo Deportivo.
Disfata 4-2 në Paris shënoi humbjen e parë të katalunasve këtë sezon. Më pas, ata u mposhtën 2-1 nga Real Madridi në El Clasico, të zhvilluar në ‘Camp Nou’.
Të lidhura
None found
Të mërkurën, futbollistët u mblodhën me trajnerin gjerman dhe stafin e tij në kompleksin stërvitor Joan Gamper, ku ndanë një drekë me skarë. Takimi synonte të përmirësonte klimën në skuadër.
Ideja, sipas raportimit, erdhi nga Raphinha dhe Rodri, të cilët propozuan këtë nismë për të afruar lojtarët dhe për të rikthyer harmoninë mes tyre.
Në këtë fazë, Flick e konsideron bashkimin e skuadrës ndër prioritetet kryesore. Trajneri dëshiron të ruajë moralin dhe të forcojë frymën kolektive, jo të merret vetëm me përgatitjen taktike, në mënyrë që Barcelona të reagojë shpejt pas rezultateve të fundit.
Klubi katalunas ka tri përballje të rëndësishme përpara: më 31 tetor luan me Alavesin, më 3 nëntor me Aston Villas dhe më 8 nëntor udhëton për ndeshjen ndaj Atletico Madridit.
Barcelona synon të gjejë sërish formën që e ndihmoi të arrinte 11 fitore radhazi. Megjithatë, përveç rezultateve negative, ekipi po ndikohet edhe nga dëmtimet në repartin mbrojtës.
Eric Garcia dhe Andreas Christensen janë ende në fazë rikuperimi, ndërsa Jules Kounde po punon për t’u rikthyer në fushë.
Lufta në kampionat mbetet e ngushtë: Atletico Madridi është vetëm dy pikë pas Barcelonës, kurse Real Madridi e kryeson rivalin katalunas me tri pikë.
Flick shpreson se stabiliteti dhe uniteti i rikthyer do ta ndihmojnë Barcelonën të kapërcejë këtë periudhë të vështirë dhe të rifillojë marrjen e rezultateve pozitive.
