Projeksioni i CeSID dhe Ipsos, dy organizata që zhvillojnë sondazhe zgjedhore në Serbi, e nxjerr Koalicionin Shqiptar me dy përfaqësues në Parlamentin serb, ndërsa Lista Studentore siguron shumicën absolute.
Sipas të dhënave paraprake, koalicioni ka grumbulluar 0,8% të votave në rang vendi, rezultat që i siguron dy mandate parlamentare.
Të lidhura
None found
Në bazë të renditjes së kandidatëve, vendet pritet t’u takojnë Shaip Kamberit të Partisë për Veprim Demokratik (PVD) dhe Visar Mehmetit të Alternativës për Ndryshim (APN).
Koalicioni Shqiptar u krijua nga tetë parti politike të Preshevës, Bujanocit dhe Medvegjës dhe garoi si listë e pakicës kombëtare. Për rrjedhojë, ai nuk i nënshtrohet pragut zgjedhor prej 3% që vlen në mënyrë të përgjithshme.
Mandatet e parashikuara nga CeSID dhe Ipsos
Lista Studentore renditet e para me 52% të votave dhe 139 mandate nga 250 vendet e Parlamentit. Ndërkohë, lista “Serbia e Bashkuar”, e drejtuar nga Aleksandër Vuçiqi, ka marrë 39,3% të votave dhe 104 mandate.
Me 2,3% të votave, lista “Faktori i Stabilitetit” e Ivica Daçiqit nuk arrin të hyjë në Parlament.
Më herët gjatë mbrëmjes, presidenti serb Aleksandër Vuçiq pranoi humbjen në zgjedhje, duke thënë se të dhënat e mbledhura nga mostra e koalicionit të tij tregonin një avantazh të Listës Studentore.
Dy mandatet e pritshme për shqiptarët do të përbënin një përmirësim në krahasim me zgjedhjet e kaluara, kur partitë shqiptare garuan të ndara dhe Lugina e Preshevës përfaqësohej vetëm nga një deputet në Parlamentin e Serbisë.
Pjesëmarrja e lartë në Luginë, ku në Preshevë deri në orën 19:00 kishin votuar më shumë se 37% e zgjedhësve, së bashku me ardhjen e votuesve nga Kosova gjatë pasdites, ndikoi në rezultatin e koalicionit.
Komisioni Republikan i Zgjedhjeve në Serbi pritet të publikojë rezultatet zyrtare dhe përfundimtare.
