Familjarët e Erjon Vishkullit kanë dhënë versione të ndryshme për dërgimin e 28-vjeçarit në Itali, ku po merr trajtim të specializuar. I riu u plagos rëndë në sy nga një plumb gome gjatë protestës së 24 tetorit në Tiranë.
Motra e tij shkroi në Instagram se transferimi ishte bërë i mundur nga familja, miqtë dhe mbështetësit, jo nga shteti. Ajo falënderoi personat që morën nismën për trajtimin më të specializuar në Itali dhe u kërkoi portaleve të mos publikonin lajme të pavërtetuara për shikime apo propagandë politike.
Të lidhura
None found
Sipas saj, çështja nuk duhej përdorur për qëllime politike dhe për t’i atribuar kryeministrit Edi Rama urdhër për mbulimin e shpenzimeve të operacioneve. Ajo kërkoi shpërndarjen e lajmeve të sakta dhe i përcolli vëllait urimin që të kthehej në shtëpi shëndoshë e mirë.
Vëllai i Erjonit dha një tjetër version në një reagim që u shpërnda edhe nga kryeministri Edi Rama. Ai tha se strukturat shtetërore iu përgjigjën familjes për çdo nevojë, përfshirë avionin e posaçëm dhe mjekët që udhëtuan me të riun drejt Italisë.
Vëllai njoftoi se gjendja e Erjonit ishte e stabilizuar dhe se familjarët kishin marrë lajme inkurajuese. Ai shprehu shpresën që i vëllai të rikuperohej dhe të kthehej si më parë.
Ndërhyrja e dytë kirurgjikale pritet të kryhet ditën e nesërme, tha ai, duke shpresuar për lajme të mira.
