Duke folur për protestën dhe përplasjet e ndodhura në Tiranë, Monika Kryemadhi tha se pasojat dhe dhimbja nuk kufizohen te të lënduarit. Ato ndihen edhe nga familjarët e tyre, rrethi shoqëror dhe qytetarët që i ndjekin ngjarjet.
Kryemadhi u shpreh se nuk merr pjesë vetë në protestë, sepse mendon se përfshirja e politikanëve dhe ish-politikanëve mund të ndikojë negativisht në imazhin e tubimit. Sipas saj, mbështetja për protestuesit mund të jepet edhe pa qenë në shesh.
Të lidhura
None found
Ajo e përshkroi situatën si të pakuptimtë, duke thënë se vuajtja ndihet edhe nga prindërit, të afërmit dhe ata që i shohin ngjarjet nga jashtë. Sipas saj, pakuptimësia vlen edhe për palën përballë, pasi ajo mund të humbasë, por më pas të largohet, dhe asgjë nuk zgjat përgjithmonë.
“Nuk shkoj në protestë, sepse nuk dua që imazhi i politikanit apo i ish-politikanit të ndikojë negativisht. Mendoj se secili mund të japë kontribut në mënyra të ndryshme: duke nxitur njerëzit e rrethit të vet shoqëror, që nuk janë figura publike, të dalin në shesh, si edhe duke ndihmuar familjarët”, tha Kryemadhi.
Ajo shtoi se ndihma mund të jetë edhe përmes dërgimit të ushqimeve, ujit dhe ujit fiziologjik, si dhe kontributeve në GoFundMe.
