Protesta e 12-të studentore e zhvilluar në Tiranë është pasqyruar nga media franceze France 24, e cila ka raportuar për tensionet në rritje, përplasjet me policinë dhe pakënaqësinë e qytetarëve ndaj korrupsionit dhe kushteve të jetesës në Shqipëri.
Sipas artikullit, protestuesit kanë theksuar se nuk përfaqësohen nga partitë politike. Në pankartat e tyre janë drejtuar kritika si ndaj kryeministrit Edi Rama, ashtu edhe ndaj liderit të opozitës, Sali Berisha.
Të lidhura
None found
Tubimi i së shtunës u shoqërua me përplasje të reja mes demonstruesve dhe forcave të rendit. France 24 shkruan se policia përdori topa uji, gaz lotsjellës dhe plumba gome, ndërsa disa prej protestuesve hodhën gurë dhe fishekzjarrë në drejtim të efektivëve.
Gjatë protestave, sipas raportimit, janë sulmuar disa ndërtesa qeveritare dhe janë ndaluar dhjetëra persona. Autoritetet e cituara në artikull deklarojnë se numri i protestuesve dhe punonjësve të policisë të plagosur ka kaluar 300.
“Ka shumë zemërim”, është shprehur aktivistja Sidorela Vatnikaj, e cila e ka cilësuar këtë lëvizje një “revolucion”. Ajo ka nënvizuar se kauza nuk kufizohet vetëm te studentët apo problemet mjedisore, por përfshin edhe gjendjen e të drejtave dhe të shtetit ligjor në Shqipëri.
Raportimi i AFP-së bën të ditur se mijëra qytetarë iu bashkuan thirrjes për protestën e së shtunës. Në mbështetje të tubimit janë shprehur gjithashtu grupe të pedagogëve universitarë, artistë dhe parti opozitare.
Solidariteti i bizneseve me protestuesit është një tjetër zhvillim i evidentuar nga France 24. Para nisjes së protestës, shumë dyqane ulën qepenat, ndërsa disa prej tyre shfaqën mesazhe mbështetëse, përfshirë atë “Mos prekni. Jemi me ju”.
Pak minuta pas nisjes së tubimit përpara Ministrisë së Arsimit, një prej pikave kryesore të protestave, një grup demonstruesish qëlloi me gurë drejt godinës. Një gazetar i AFP-së raportoi se disa dritare të saj ishin dëmtuar edhe gjatë ditëve të mëparshme. Për t’i shpërndarë protestuesit, policia përdori ujë me presion, gaz lotsjellës dhe plumba gome.
Artikulli francez trajton edhe pasigurinë e të rinjve për të ardhmen e tyre në Shqipëri. Rosela Mira, studente e vitit të parë në Mjekësi, i tha AFP-së se dëshiron të vijojë jetën në vendin e saj dhe të ketë mundësinë për një të ardhme më të mirë.
“Jemi këtu për një arsye: duam të qëndrojmë në vendin tonë dhe të mos na duhet të ëndërrojmë për një jetë diku tjetër”, deklaroi ajo.
Shqetësimet për arsimin u ngritën edhe nga motra e saj, nxënëse e shkollës së mesme. Ajo foli për klasa me rreth 40 nxënës dhe për mungesën e hapësirave të domosdoshme, mes tyre edhe laboratorët.
Problemet ekonomike përbëjnë një tjetër arsye të fortë të pakënaqësisë. Fabiola Nikaj, studente e vitit të tretë në Fakultetin e Drejtësisë, deklaroi se shumë të rinj detyrohen të punojnë në disa vende për të mbështetur familjet e tyre, veçanërisht për shkak të pensioneve të ulëta të prindërve.
Mesazhet e shfaqura në pankartat e mësuesve dhe pedagogëve përfshinin thirrje si “Jo dhunë”, “Transparencë” dhe “Demokracia në rrezik”.
France 24 ndalet edhe te emigracioni, duke raportuar se mbi 1.5 milionë persona janë larguar nga Shqipëria që prej rrëzimit të komunizmit në vitet 1990. Ndërkohë, popullsia e vendit vlerësohet në rreth 2.3 milionë banorë.
Në artikull përmendet gjithashtu se Shqipëria renditet e 91-ta mes 182 shteteve në Indeksin e Perceptimit të Korrupsionit të Transparency International.
Media franceze e përshkruan protestën studentore si shprehje të një pakënaqësie më të gjerë shoqërore. Kërkesat për transparencë, drejtësi, kushte më të mira jetese dhe mundësi për të ardhmen shoqërohen me kundërshtimin ndaj klasës politike.
