Protestat kundër shtrenjtimit të jetesës u shtrinë të shtunën në qytete të ndryshme të Francës. Për të shmangur përsëritjen e dhunës së shënuar gjatë fundjavës së mëparshme, autoritetet mobilizuan një numër të madh forcash policore.
Ministri i Brendshëm Laurent Nunez deklaroi, sipas AFP-së, se në rang vendi u arrestuan afro 1 mijë persona. Sipas tij, policia u përball me një shkallë jashtëzakonisht të lartë dhune nga persona të veshur me të zeza, të lidhur me grupe ekstremiste.
Të lidhura
None found
Nunez tha se marshimet në shumicën e qyteteve përfunduan pa incidente të mëdha, por grupe të ekstremit të majtë hodhën sende dhe fishekzjarrë në drejtim të efektivëve, duke shkaktuar përleshje.
Ministri njoftoi gjithashtu se dy persona pësuan plagë të rënda, njëri në Tuluzë dhe tjetri në Clermont-Ferrand. Në Tuluzë, një 20-vjeçar dyshohet se humbi disa gishta pas një shpërthimi.
Në Paris, përplasjet nisën në përfundim të marshimit, në lindje të kryeqytetit. Gazetarët e AFP-së raportuan se policia përdori shkopinj gome dhe gaz lotsjellës për të larguar protestuesit, ndërsa autoritetet konfirmuan edhe ndërhyrjen me topa uji.
Një protestues i quajtur David, i cili kishte marrë një goditje me shkop gome dhe ishte gjakosur, deklaroi për AFP-në se policia ishte afruar drejt turmës dhe u kishte kërkuar njerëzve të uleshin e të tërhiqeshin. Ai pretendoi se efektivët po rrëzonin dhe godisnin demonstruesit.
Ministria e Brendshme vlerësoi se në protestat në të gjithë Francën morën pjesë rreth 410 mijë persona, mes tyre 110 mijë në Paris. Sindikata CGT, e cila ishte ndër organizatorët, dha një shifër tjetër, duke thënë se numri i pjesëmarrësve arriti në 800 mijë në rang vendi dhe 250 mijë në kryeqytet.
Përleshje u raportuan në Paris, Lion, Lilë, Marsejë, Montpellier, Nantë dhe Tuluzë. Sipas policisë së Parisit, gjatë demonstratës u ndaluan dhe u kontrolluan mbi 3 mijë persona, ndërsa 65 prej tyre u arrestuan.
Në Marsejë, policia llogariti rreth 17 mijë pjesëmarrës në marshim, kurse sindikatat pretenduan se numri ishte 100 mijë. Një reporter i AFP-së tha se në periferi të protestës pati përplasje mes policisë dhe disa demonstruesve, të cilët sulmuan disa biznese lokale.
Gaz lotsjellës u përdor edhe në Lion, Lilë, Montpellier, Nantë dhe Tuluzë, ku policia synoi të ndalonte protestuesit të hynin në qendrat e qyteteve.
Para nisjes së protestave, ministri i Brendshëm Laurent Nunez kishte paralajmëruar se dhuna dhe shkelja e rendit publik nuk do të toleroheshin.
Forcat e rendit sekuestruan një sërë armësh dhe sendesh të rrezikshme, përfshirë sfera metalike, fishekë me saçmë plumbi, fishekzjarrë, llastiqe, armë të improvizuara, një katana dhe armë të përdorura në lojërat airsoft.
Më herët, qindra demonstrues u mblodhën në zonën Porte d’Italie, në periferi të Parisit. Ata u zhvendosën atje pasi policia urdhëroi në minutat e fundit ndryshimin e itinerarit të marshimit sindikal, i cili ishte planifikuar të niste nga sheshi Bastille.
Përfaqësuesja e sindikatave Murielle Guilbert e quajti vendimin “skandaloz” dhe akuzoi presidentin Emmanuel Macron se po pengonte protestuesit të demonstronin në vendin e përzgjedhur prej tyre.
Lëvizja e Jelekëve të Verdhë, e cila tetë vjet më parë organizoi protesta të mëdha kundër presidentit Emmanuel Macron, njoftoi një valë të re tubimesh më 31 tetor.
Organizatorët u kërkuan qytetarëve të marrin pjesë në protesta dhe në një ulje proteste përpara parlamentit dhe bashkive në të gjithë vendin. Ata kundërshtojnë atë që e cilësojnë si “rrëshqitje autoritare” të qeverisë së Macron dhe kërkojnë garantimin e lirive publike.
Në Orlean, mijëra persona marshuan me thirrje antifashiste kundër kongresit të partisë së ekstremit të djathtë Tubimi Kombëtar (RN), e drejtuar nga Marine Le Pen, raportoi AFP.
Protestuesit shprehën kritika ndaj Marine Le Pen, e konsideruar një nga kandidatet kryesore për presidencën, si edhe ndaj presidentit Emmanuel Macron.
Të shtunën qëndruan të mbyllur në Paris Muzeu i Luvrit, Muzeu d’Orsay, Muzeu Picasso dhe Grand Palais. Sipas AFP-së, Ministria franceze e Kulturës u kishte kërkuar institucioneve të zbatonin të gjitha masat e nevojshme për sigurinë e vizitorëve dhe punonjësve, si dhe për mbrojtjen e veprave të artit.
