Sulmuesi kosovar Muhamet Hyseni do të mungojë për afërsisht gjashtë javë, pasi ka pësuar një problem muskulor. Vështirësitë po e shoqërojnë që në muajt e parë të aventurës në futbollin rumun.
Hyseni iu bashkua këtë sezon Farul Constanțas, ekipit të Superligës rumune, në formë huazimi nga klubi danez AC Horsens.
Të lidhura
None found
Fillimisht, sulmuesit iu desh të përballej me një periudhë të vështirë personale, pas vdekjes së babait të tij në mes të shtatorit. Përveç kësaj, ai priti edhe pajisjen me leje pune nga autoritetet rumune.
Pasi kaloi këto pengesa, Hyseni u aktivizua si titullar për herë të parë me fanellën e Farulit dhe zhvilloi një paraqitje të mirë. Pas ndeshjes, megjithatë, nisi të ndiente dhimbje në muskujt e barkut.
Trajneri i skuadrës, Ioan Sabau, e bëri të ditur lëndimin dje, në konferencën për shtyp para ndeshjes me Otelul.
Mungesa vjen në një kohë kur Hyseni sapo kishte nisur të merrte minutat e para dhe të përshtatej me ekipin e ri e kampionatin rumun.
Tani prioritet është rikuperimi i sulmuesit, me synimin që ai të kthehet sa më shpejt në dispozicion të skuadrës dhe të tregojë aftësitë e tij në futbollin rumun.
