E ardhmja e Alejandro Baldes te Barcelona është sërish në diskutim, pasi mbrojtësi i majtë ka pasur më pak peshë në planet e trajnerit Hansi Flick gjatë këtij sezoni.
Agjenti i tij, Jorge Mendes, po shqyrton mundësi për transferimin e lojtarit në një klub tjetër, raporton mediumi Sport. Një nga destinacionet që është përmendur së fundmi është Italia.
Të lidhura
None found
Sipas gazetës italiane Il Messaggero, Mendes ia ka propozuar Balden Romës, e cila po vlerëson mundësinë e transferimit të tij në afatin kalimtar të janarit.
Gian Piero Gasperini synon të përforcojë krahun e majtë të mbrojtjes dhe drejtuesit e klubit italian e shohin Balden si një përforcim të përshtatshëm për skuadrën.
Propozimi është që lojtari të huazohet deri në përfundim të këtij sezoni, me një klauzolë që do t’i jepte Romës mundësinë për ta blerë përfundimisht.
Një marrëveshje e tillë mund t’u leverdiste të dy klubeve: Roma do ta merrte Balden pa bërë menjëherë një investim të madh, ndërsa Barcelona do të ruante mundësinë për të përfituar një shumë të konsiderueshme në rast shitjeje gjatë verës së ardhshme.
Interesimi nga Italia nuk është i ri. Disa javë më parë, edhe Juventusi kishte shqyrtuar mundësinë për ta transferuar mbrojtësin.
Në fund të shtatorit, Sport raportoi se Juventusi po mendonte për një huazim me opsion blerjeje. Por vlerësimi prej rreth 50 milionë eurosh që Barcelona i kishte caktuar Baldes përbënte një pengesë të madhe për marrëveshjen.
