Drejtoria e të Ardhurave Publike (DAP) ka filluar verifikimin e informacionit të marrë nga bankat lidhur me paratë që qytetarët kanë pranuar nga jashtë gjatë vitit 2021.
Në kuadër të këtij procesi, DAP u ka dërguar njoftime individuale personave rezidentë në Maqedoninë e Veriut, për të cilët disponon të dhëna se kanë përfituar të ardhura nga jashtë vendit.
Të lidhura
None found
Përmes këtyre njoftimeve, qytetarëve u kërkohet që brenda afatit të përcaktuar të përmbushin detyrimet tatimore të parashikuara me ligj. Institucioni kujton se për detyrimet që lidhen me vitet e mëparshme qytetarët janë informuar në disa raste edhe përmes mediave.
DAP paralajmëron se, nëse detyrimet nuk shlyhen në mënyrë vullnetare, do të ndërmerren masa ligjore për përcaktimin e tatimit.
Institucioni sqaron se pranimi i parave nga jashtë nuk nënkupton automatikisht se çdo shumë duhet të tatohet në Maqedoninë e Veriut.
Detyrimi për deklarim zbatohet vetëm për të ardhurat që i nënshtrohen tatimit sipas Ligjit për tatimin mbi të ardhurat personale.
Mes të ardhurave të tatueshme përfshihen pagat, honoraret, pagesat për shërbime freelancer, të ardhurat nga qiraja, fitimet e realizuara nga shitja e pasurive dhe kriptovalutave, dividentët, interesat, të ardhurat nga të drejtat e autorit dhe fitimet nga lojërat e fatit.
Ndërkohë, shumat e marra si dhurata, ndihmë nga familjarët ose hua, si edhe paratë e dërguara përmes Western Union, Ria dhe MoneyGram, nuk tatohen automatikisht vetëm për faktin se kanë ardhur nga jashtë.
Përcaktimi i trajtimit tatimor bëhet në varësi të arsyes së transferimit dhe nëse shuma përbën apo jo të ardhur të tatueshme sipas ligjit.
Në rastet kur kërkohet, qytetarët duhet të disponojnë dokumente ose dëshmi që vërtetojnë bazën mbi të cilën janë pranuar paratë.
DAP u kërkon të gjithë personave që kanë marrë para nga jashtë të verifikojnë nëse kanë detyrim tatimor dhe, kur kjo është e nevojshme, të dorëzojnë llogaritjen elektronike të tatimit paraprak, e-PDD.
Po ashtu, ata duhet të paguajnë shumën e përcaktuar të tatimit, në mënyrë që të shmangin nisjen e procedurave të mundshme kundërvajtëse ose tatimore. Për informacione dhe udhëzime të mëtejshme, qytetarët mund të konsultojnë faqen zyrtare të DAP-së ose të përdorin shërbimet elektronike tatimore.
Ndihmë mund të kërkohet përmes adresës [email protected], numrit pa pagesë 0800 33 000, numrit 02 3253 200, si dhe në zyrat e DAP-së që mbulojnë vendbanimin e tyre.
