E ardhmja e Jules Koundes mbetet nën vlerësim te Barcelona, ku forma e shfaqur së fundmi dhe shqetësimet e përsëritura fizike të mbrojtësit francez kanë ngjallur diskutime. Në këtë kontekst, drejtori sportiv i katalunasve, Deco, është takuar joformalisht me agjentin e tij, Jonathan Kebe.
Siç bën të ditur SPORT, dreka mes tyre është zhvilluar të enjten në Barcelonë. Prania e Kebes në kryeqytetin katalunas ka shërbyer si rast për këtë takim.
Të lidhura
None found
Biseda është përqendruar te situata e tanishme e futbollistit, vendi që ai zë në skuadër dhe ecuria e riaftësimit pas lëndimit.
Gjatë muajve të fundit, Kounde e ka pasur të vështirë të gjejë sërish nivelin e tij më të mirë. Gjendja fizike, ndërkohë, ka krijuar dyshime serioze nëse ai do të jetë i gatshëm për El Clasicon e së dielës ndaj Real Madridit.
Nga rrethi i përfaqësuesve të francezit është hedhur poshtë kategorikisht pretendimi se dreka ka përfshirë bisedime për oferta apo për një largim të mundshëm të lojtarit.
SPORT citon njerëz pranë Koundes, të cilët e cilësojnë takimin si pjesë të komunikimit rutinor për të analizuar ecurinë e tij, atë që ka treguar në fushë këtë sezon dhe procesin e rikuperimit nga dëmtimi.
Sipas përfaqësuesve të mbrojtësit, Barcelona nuk ka dhënë asnjë sinjal se dëshiron ta shesë. Ata këmbëngulin gjithashtu se gjatë takimit nuk është trajtuar e ardhmja e tij në merkato.
Në anën tjetër, burime të afërta me klubin konfirmojnë se rendimenti i Koundes në muajt e fundit ka shkaktuar pikëpyetje brenda Barcelonës. Megjithatë, katalunasit vijojnë ta çmojnë atë që francezi ka dhënë që kur mbërriti në “Camp Nou”.
Sipas raportimeve, Barcelona mbetet e hapur për të dëgjuar oferta për mbrojtësin, në rast se paraqitet një propozim me peshë financiare. Një ofertë që do t’i afrohej vlerës që klubi i cakton reprezentuesit francez do të merrej në shqyrtim.
