Shoqata e Prokurorëve të Republikës së Shqipërisë ka dalë me një reagim publik pas deklaratave të Taulant Ballës, kreut të grupit parlamentar të Partisë Socialiste, të cilat kishin në shënjestër një prokuror të Tiranës për mënyrën si veproi në lidhje me arrestimet gjatë protestave kundër qeverisë.
Në një prononcim për mediat pas seancës së Kuvendit, Balla kishte drejtuar gishtin nga prokurori Arbër Berexha, duke pohuar se ai mban raporte politike me Partinë Demokratike dhe duke vënë në dyshim vendimmarrjen e tij në një çështje që prek protestuesit.
Të lidhura
None found
Deklaratat e deputetit socialist shihen me shqetësim nga Shoqata e Prokurorëve. Organizata thekson se pretendimet për lidhje politike të ngritura pa u shoqëruar me fakte konkrete, rrezikojnë të minojnë pavarësinë e prokurorëve dhe besimin e publikut ndaj sistemit të drejtësisë.
Në deklaratën e saj, Shoqata thekson se “aludimet për lidhje politike të prokurorit, të ndërlidhura me një vendimmarrje konkrete, rrezikojnë të cenojnë pavarësinë e tij, respektimi i së cilës përbën detyrim kushtetues dhe kërkesë të shtetit ligjor”.
Prokurorët, shton Shoqata, janë magjistratë që u përgjigjen vetëm Kushtetutës dhe legjislacionit në fuqi. Vendimet e tyre duhet të mbështeten te faktet dhe provat e administruara, pa u ndikuar nga presionet apo influencat e politikës.
Sipas organizatës, çdo akt i prokurorisë mund t’i ekspozohet kritikës publike, por supozimet për lidhje politike pa asnjë provë e zhvendosin debatin nga arsyetimi juridik drejt diskreditimit personal dhe profesional të magjistratit.
“Kur një pretendim i tillë përcillet bashkë me thirrje publike që Inspektori i Lartë i Drejtësisë të ndërhyjë pikërisht për këtë vendimmarrje, atëherë krijohet rreziku që prokurori dhe vendimet e tij në vijim të vihen nën presion”, nënvizohet në reagim.
Nga ana tjetër, Shoqata e Prokurorëve shpjegon se urdhri i prokurorit për lirimin e menjëhershëm të të arrestuarve, kur konstaton se arrestimi është kryer në kundërshtim me ligjin, nuk përbën vendim për mbylljen e çështjes.
Këta urdhra kanë të bëjnë me ligjshmërinë e privimit të lirisë dhe nuk e zgjidhin përfundimisht çështjen e përgjegjësisë penale. Sipas nenit 257 të Kodit të Procedurës Penale, në rastet e parashikuara nga kjo dispozitë, prokurori detyrohet ligjërisht të urdhërojë lirimin e menjëhershëm të personit të ndaluar.
Çdo ankesë për shkelje profesionale ose etike mund t’u drejtohet organeve kompetente, përfshirë Inspektorin e Lartë të Drejtësisë, dhe duhet të vlerësohet mbi bazën e provave, sipas procedurës ligjore. Po ashtu, edhe organet që kontrollojnë këto pretendime duhet ta kryejnë veprimtarinë e tyre në mënyrë të pavarur, larg presioneve politike.
Në fund, Shoqata e Prokurorëve fton përfaqësuesit politikë që ta përdorin kritikën me përgjegjësi dhe të mos i shënjestrojnë prokurorët përmes aludimeve.
“Mbrojtja e pavarësisë së magjistratëve shërben për një proces të paanshëm dhe për zbatimin e njëtrajtshëm të ligjit për çdo qytetar”, përmbyllet deklarata e datës 22 tetor 2026.
