Atleti i bodybuilding-ut Mateusz Chmura ndërroi jetë në spital pasi u rrëzua në skenë të dielën, teksa merrte pjesë në finalen e PCA në Britani. Tragjedia ndodhi një ditë përpara se ai të mbushte 34 vjeç.
Chmura, i cili ishte nga Wakefield, mori fillimisht ndihmën e parë aty ku ndodhi incidenti, i cilësuar si jashtëzakonisht i dhimbshëm. Më pas u dërgua me helikopter në spital, ku më vonë u konfirmua se kishte humbur jetën.
Të lidhura
None found
Ende nuk dihet se çfarë e shkaktoi vdekjen e tij. Lajmin për ndarjen nga jeta e bëri të ditur Shoqata e Kulturës Fizike e Mbretërisë së Bashkuar, e cila shprehu pikëllim të thellë për humbjen e atletit.
Pjesëmarrja në PCA ishte dalja e dytë e Chmura-s në një kompeticion bodybuilding-u. Debutimin e kishte bërë vetëm dy javë më herët, duke e përfunduar garën e parë në vendin e dytë.
Vdekja e tij ka tronditur edhe familjen. Vetëm dy muaj përpara ngjarjes tragjike, Chmura ishte martuar me bashkëshorten e tij, Patricia.
Pas humbjes së të shoqit, Patricia reagoi publikisht lidhur me një fushatë të pretenduar në internet për mbledhjen e fondeve në emër të tij. Përmes një postimi në Instagram, ajo bëri të qartë se askujt nuk i kishte dhënë leje të mblidhte para për të apo për familjen e saj.
Në reagimin e saj, Patricia u kërkoi njerëzve të tregoheshin të kujdesshëm ndaj nismave të tilla. Ajo theksoi se nuk do të donte që dikush të humbiste paratë e fituara me mund, me bindjen se po i vinte në ndihmë familjes gjatë kësaj periudhe të vështirë.
