Pas bllokimit të afërsisht 103 tonëve mish me afat të kaluar në Mal të Zi, që kishin si destinacion Kosovën, Ministri i Bujqësisë, Armend Muja, deklaroi për Ekonomia Online se aktualisht po zhvillohet një prej fushatave më të gjera të inspektimit të produkteve të mishit që është ndërmarrë ndonjëherë në territorin kosovar.
Ai njoftoi se për këtë situatë ka pasur komunikim të vazhdueshëm me institucionet malazeze, dhe paralajmëroi se gjatë javës së ardhshme do të realizohet një takim për të trajtuar këtë incident si dhe tema të tjera me rëndësi reciproke.
Të lidhura
None found
“Dëshiroj t’ju bëj me dije se, duke qenë se jemi në fazën përfundimtare të kontrollit zyrtar, Kosova dhe Agjencia e Ushqimit po kryejnë një nga operacionet më të mëdha të inspektimit të mishit në historinë e Republikës së Kosovës. Kemi mbajtur kontakte me autoritetet malazeze. Javën e ardhshme do të zhvillojmë një vizitë pikërisht për këtë çështje dhe për çështje të tjera. Ju garantoj se të gjitha masat janë ndërmarrë dhe do të ndërmerren nëse shkelet çdo dispozitë ligjore. Ju siguroj për angazhimin tim personal dhe të ministrisë në adresimin e çdo problemi, sidomos në fushën e mishit. Sa herë që Agjencia e Ushqimit zbulon ndonjë shkelje, ju betohem se, pas kryerjes së procedurave formale, publiku do të njoftohet dhe informohet, ashtu siç do të informoheni edhe ju. Por ne po merremi me këtë rast”, theksoi Muja.
Ky reagim i ministrit erdhi pas ngjarjes së shtatorit, kur një ngarkesë prej 24 tonësh mish viçi të ngrirë, me afat të skaduar dhe me prejardhje nga Brazili, e cila ishte drejtuar për kompaninë kosovare “Apetit SHPK”, u ndalua nga autoritetet malazeze në Portin e Tivarit.
Më herët, autoritetet e Malit të Zi kishin sekuestruar edhe tre kontejnerë shtesë me mish viçi, me një peshë totale prej 77 tonësh. Në shumën e përgjithshme, bëhej fjalë për rreth 102 tonë mish të skaduar.
Sipas raportimeve të gazetës malazeze Vijesti, ngarkesa ishte nisur për në Kosovë, por gjatë inspektimit në port u zbulua se data e skadencës kishte kaluar.
Dogana malazeze kishte bërë të ditur gjithashtu se punonjësit e kompanisë kosovare ishin përfshirë në ndërrimin e etiketave që tregonin afatin e përdorimit të mishit, në hapësirat e Portit të Tivarit.
