Rusia është parimisht e gatshme të rikthehet në bisedime me Ukrainën dhe Shtetet e Bashkuara gjatë muajit nëntor, me synim përfundimin e konfliktit në Ukrainë. Këtë e bëri të ditur këshilltari i politikës së jashtme të Kremlinit, Yuri Ushakov, pas takimit të presidentit rus Vladimir Putin me të dërguarin e posaçëm amerikan Steve Witkoff.
Sipas Ushakov, raundi i ardhshëm i negociatave duhet t’i kushtohet krijimit të “një sistemi sigurie për Rusinë dhe Ukrainën pas përfundimit të konfliktit”, raportoi Reuters.
Të lidhura
None found
“Raundi i ri i bisedimeve mund të zhvillohet në Abu Dhabi rreth mesit të nëntorit”, deklaroi Ushakov për kanalin televiziv Vesti.
Negociatat e fundit mes tre palëve u zhvilluan në shkurt.
Ushakov tha se Witkoff i përcolli Putinit informacion mbi bisedimet e zhvilluara një ditë më parë në Oslo, ku përfaqësuesi amerikan u takua me presidentin ukrainas Volodymyr Zelensky, kryeministrin norvegjez dhe presidentin finlandez.
Sipas këshilltarit rus, Witkoff paraqiti “disa qasje të reja, pika të reja në qëndrimet e evropianëve dhe Kievit”, por ato, sipas tij, nuk përmbanin shumë elemente të dobishme për zgjidhjen e krizës ukrainase.
Putin dhe i dërguari amerikan zhvilluan një takim treorësh, gjatë të cilit diskutuan zbatimin e marrëveshjes së 9 tetorit mes presidentit rus dhe presidentit të SHBA-së, Donald Trump, për furnizimin e tregjeve amerikane dhe atyre globale me naftë ruse.
Gjatë takimit u trajtua gjithashtu edhe kriza në Iran, bëri të ditur Ushakov.
“Vladimir Putin theksoi se mundësitë e diplomacisë janë larg të qenit të shteruara dhe se është e mundur dhe e nevojshme të arrihen marrëveshje me Teheranin, i cili është partneri ynë strategjik”, tha ai.
Këshilltari i Kremlinit shtoi se Rusia rikonfirmoi gatishmërinë për të vijuar përpjekjet në funksion të gjetjes së zgjidhjeve politike dhe diplomatike për çështjen iraniane.
