Qëndrimi dhe përkushtimi në punë i Jude Bellinghamit në qendrën stërvitore të Real Madridit kanë bërë përshtypje të madhe te Jose Mourinho.
Portugezi u rikthye gjatë verës për një aventurë të dytë me Los Blancos, ku i është dashur të drejtojë disa nga emrat më të mëdhenj të futbollit botëror, mes tyre Kylian Mbappen, Vinicius Juniorin dhe Bellinghamin.
Të lidhura
None found
Por, sipas raportimeve, ajo që e ka tërhequr më së shumti vëmendjen e Mourinhos është puna që mesfushori anglez bën gjatë stërvitjeve.
Marcos Benito, nga emisioni El Chiringuito, raporton se ish-lojtari i Borussia Dortmundit shfaq profesionalizëm të jashtëzakonshëm dhe kalon shpesh deri në tetë orë në ditë në kompleksin stërvitor të klubit, në Valdebebas.
Bellingham, sipas këtyre raportimeve, zakonisht largohet i fundit nga qendra, duke qëndruar më gjatë se pjesa tjetër e bashkëlojtarëve. Kjo e ka habitur Mourinhon dhe ka mahnitur edhe futbollistët e tjerë të Real Madridit.
Shembulli i 23-vjeçarit shihet si një ndikim pozitiv për të gjithë grupin.
Sezonin e kaluar, Bellingham kaloi një periudhë të vështirë dhe luajti pavarësisht dhimbjeve fizike. Tani është rikthyer në formë dhe ka regjistruar shtatë kontribute në gola në 11 paraqitje.
Rëndësia e tij në skuadër dhe paraqitjet e deritanishme pritet të shpërblehen me një kontratë të re me kushte më të mira, që do ta mbajë te “Santiago Bernabeu” deri në vitin 2031.
Zyrtarizimi i zgjatjes së marrëveshjes pritet të ndodhë së shpejti. Me këtë kontratë, Bellingham do të jetë i lidhur me kampionët 15-herë të Evropës deri kur të mbushë 28 vjeç.//
