Dani Olmo mund të mos jetë i gatshëm për ndeshjen e së dielës kundër Real Madridit, pas dëmtimit që pësoi në sfidën e Barcelonës me Paris Saint-Germainin.
Mediumi spanjoll AS raporton se mesfushori ofensiv nuk pritet të rikuperohet në kohë për El Clasicon, duke i krijuar një tjetër vështirësi trajnerit Hansi Flick në përzgjedhjen e skuadrës.
Të lidhura
None found
Diagnoza përfundimtare dhe periudha e rikuperimit ende nuk dihen. Barcelona duhet t’i nënshtrojë lojtarët në ekzaminimet mjekësore për të përcaktuar shkallën e lëndimit të Olmos.
Ai e nisi nga minuta e parë ndeshjen ndaj PSG-së, ku Flick e përzgjodhi para Fermin Lopezit në mesfushë. Por paraqitja e tij zgjati vetëm deri në minutën e 27-të, kur u përplas me mesfushorin e skuadrës franceze, Vitinha.
Olmo u rrëzua dhe e kuptoi se nuk mund ta vazhdonte lojën, ndaj kërkoi zëvendësim. Fermin Lopez hyri në vend të tij, ndërsa pamjet televizive treguan spanjollin të dëshpëruar për shkak të dëmtimit.
Sipas AS, një rezonancë magnetike e planifikuar për të mërkurën në Barcelonë do të ndihmojë në përcaktimin e diagnozës së saktë dhe të kohës së nevojshme për rikuperim.
Nëse vërtetohet dyshimi për çarje muskulore, mesfushori mund të mungojë për katër deri në pesë javë.
Mungesa e tij do të ishte një goditje e rëndësishme për Flickun, që do të humbiste një tjetër mundësi të vlefshme në një periudhë me shumë ndeshje dhe me kërkesa të larta.
