Paris Saint-Germaini ka pësuar një humbje të rëndësishme, pasi Khvicha Kvaratskhelia do të mungojë gjatë për shkak të dëmtimit serioz të marrë në përballjen e Ligës së Kampionëve ndaj Barcelonës.
Kontrollet mjekësore kanë konfirmuar çarjen e ligamentit të kryqëzuar të përparmë në gjurin e djathtë të sulmuesit gjeorgjian, njoftoi zyrtarisht klubi francez.
Të lidhura
None found
Sipas PSG-së, Kvaratskhelia do t’i nënshtrohet një ndërhyrjeje kirurgjikale gjatë ditëve në vijim. Lëndimi u pësua në fitoren 4-2 të parisienëve kundër Barcelonës.
Sulmuesi anësor u detyrua të linte fushën gjatë pjesës së dytë, ndërsa ekzaminimet e kryera më pas përcaktuan rëndësinë e dëmtimit dhe nevojën për operacion.
Mungesa e tij përbën një goditje të fortë për kampionët e Francës, të cilët humbasin një prej futbollistëve më të rrezikshëm në repartin ofensiv. Afati i rikuperimit nuk është përcaktuar ende dhe pritet të qartësohet pas operacionit dhe nisjes së rehabilitimit.
Problemet e PSG-së në aspektin e dëmtimeve shtrihen edhe te Ousmane Dembele, i cili do të vijojë trajtimin gjatë javëve të ardhshme për shkak të një dëmtimi muskulor në kofshën e majtë.
Edhe mbrojtësi brazilian Marquinhos do të qëndrojë jashtë për një periudhë të caktuar. Ai pësoi një dëmtim muskulor në kofshën e djathtë gjatë së njëjtës ndeshje.
