Për dekada me radhë, Kennedy-t kanë qenë ndër familjet politike më të njohura në Shtetet e Bashkuara. Por famës, ndikimit dhe pushtetit të tyre u është bashkëngjitur një histori e gjatë humbjesh që kanë tronditur opinionin publik.
Vrasjet, aksidentet ajrore, sëmundjet dhe vdekjet e parakohshme kanë krijuar legjendën e quajtur “mallkimi i Kennedy-ve”.
Të lidhura
None found
Vdekja e Kyle Kennedy-t, mbesës 42-vjeçare të Robert F. Kennedy-t, e ka rikthyer këtë histori në vëmendje. Ajo vdiq më 21 shtator në shtëpinë e saj në Westwood; shkaku i vdekjes nuk është bërë i ditur. Jeta e Kyle-s ishte shoqëruar me vështirësi, mes tyre një dëmtim i rëndë i shtyllës kurrizore në vitin 2020, që i shkaktoi paralizë dhe paaftësi afatgjatë.
Ajo u angazhua për të drejtat e personave me aftësi të kufizuara dhe, pavarësisht sfidave, u përpoq të rriste dy djemtë. Më herët kishte humbur vajzën e saj, Josie, e cila vdiq vetëm pak ditë pas lindjes. Kur ishte 13 vjeçe, Kyle humbi edhe të atin, Michael Kennedy-n, i cili pësoi një aksident fatal me ski në Aspen, natën e Vitit të Ri të vitit 1997.
Një tjetër humbje e fundit në familje ishte ajo e Tatiana Schlossberg-ut, mbesës së presidentit John F. Kennedy. Ajo vdiq më 30 dhjetor 2025, në moshën 35-vjeçare, pas përballjes me një formë të rrallë dhe agresive të leuçemisë akute mieloide.
Rrënjët e familjes lidhen me Joseph Patrick Kennedy-n, biznesmen të pasur dhe me ambicie politike. Ai dhe bashkëshortja, Rose Fitzgerald, patën nëntë fëmijë, ndërsa synimi i tij ishte që njëri prej tyre të bëhej president i Shteteve të Bashkuara.
Megjithatë, rrugëtimi i familjes drejt pushtetit u shënua herët nga tragjeditë. Në vitin 1941, vajza Rosemary iu nënshtrua një lobotomie, ndërhyrje që i shkaktoi dëmtime të rënda dhe ndikoi në gjithë jetën e saj të mëvonshme.
Në vitin 1944, djali i madh, Joseph P. Kennedy Jr., vdiq gjatë Luftës së Dytë Botërore. Avioni i tij shpërtheu mbi Angli teksa ai po kryente një mision ushtarak. Katër vjet më pas, në vitin 1948, Kathleen Kennedy humbi jetën në një aksident ajror në Francë.
Pavarësisht humbjeve, ambicia politike e familjes u realizua kur John Fitzgerald Kennedy u zgjodh president i Shteteve të Bashkuara në vitin 1960. Ai u bë një prej figurave më të rëndësishme të historisë moderne amerikane.
Mandati i tij përfundoi me vrasjen në Dallas, më 22 nëntor 1963, gjatë një vizite zyrtare. Atentati shkaktoi tronditje në Amerikë dhe në mbarë botën.
Rrethanat e vrasjes vazhdojnë të debatohen. Komisioni Warren përfundoi se Lee Harvey Oswald kishte vepruar i vetëm. Ndërsa, në vitin 1979, një komitet i Kongresit vlerësoi se vrasja ka të ngjarë të ishte kryer si pjesë e një komploti, por nuk përcaktoi përfundimisht se kush ishte përgjegjës.
Në vitin 1968, pesë vjet pas vrasjes së presidentit, edhe vëllai i tij, Robert F. Kennedy, u vra në Los Anxhelos. Ai ishte 42 vjeç dhe sapo kishte fituar zgjedhjet paraprake presidenciale në Kaliforni.
Një ngjarje tjetër që lidhet me legjendën e “mallkimit” ndodhi në vitin 1969. Automjeti i drejtuar nga senatori Ted Kennedy doli nga një urë në ishullin Chappaquiddick. Mary Jo Kopechne, e cila ndodhej në makinë, humbi jetën.
Ted Kennedy mbijetoi, por nuk e njoftoi menjëherë aksidentin. Ngjarja e dëmtoi rëndë reputacionin e tij politik dhe mbeti ndër episodet më të debatuara të jetës së senatorit.
Disa ditë pas aksidentit, në një fjalim televiziv, Ted Kennedy pyeti nëse familja e tij ishte e përndjekur nga një mallkim. Kjo deklaratë kontribuoi në përhapjen e gjerë të shprehjes “mallkimi i Kennedy-ve” në kulturën amerikane.
Humbjet vazhduan edhe në dekadat pasuese. David Kennedy, djali i Robert F. Kennedy-t, vdiq nga mbidoza në vitin 1984, në moshën 28-vjeçare. Në vitin 1999, John F. Kennedy Jr., djali i presidentit të vrarë, u vra në një aksident ajror bashkë me bashkëshorten, Carolyn Bessette, dhe motrën e saj, Lauren Bessette.
Në vitin 2012, Mary Richardson Kennedy, ish-bashkëshortja e Robert F. Kennedy Jr., vdiq në moshën 52-vjeçare. Në vitin 2019, Saoirse Kennedy Hill, mbesa e Robertit, ndërroi jetë nga një mbidozë, në moshën 22-vjeçare.
Një tjetër tragjedi ndodhi në vitin 2020, kur Maeve Kennedy McKean, mbesë e Robert F. Kennedy-t, dhe djali i saj tetëvjeçar, Gideon, humbën jetën. Kanoeja ku ndodheshin u shty nga era dhe rrymat në Gjirin Chesapeake.
Humbjet e shumta kanë bërë që historia e Kennedy-ve të shihet nga shumë njerëz si një përsëritje e fatit të keq. Megjithatë, nuk ekzistojnë prova që të vërtetojnë se një mallkim i tillë është real.
Disa biografë ia atribuojnë këtë histori ndërthurjes së ambicieve të mëdha me ekspozimin e vazhdueshëm publik, rreziqet e jetës politike dhe personale, si dhe pasurinë e famën. Anëtarët e familjes kanë qenë shpesh në qendër të vëmendjes; disa janë përfshirë në veprimtari të rrezikshme, ndërsa të tjerë janë përballur me probleme serioze personale dhe shëndetësore.
Përtej legjendës, historia e Kennedy-ve tregon se as pushteti dhe as privilegji nuk i përjashtojnë njerëzit nga tragjeditë. Me vdekjen e Kyle Kennedy-t, lista e humbjeve të familjes që renditet ndër më të famshmet në historinë amerikane është shtuar edhe me një emër tjetër.
