Agron Shehaj, kryetar i partisë “Mundësia”, iu bashkua protestuesve në Bulevardin “Dëshmorët e Kombit” dhe foli drejtpërdrejt për News24. Ai kritikoi ashpër policinë për ndërhyrjen ndaj demonstruesve paqësorë, duke ia atribuuar përgjegjësinë për urdhërimin e përdorimit të forcës kryeministrit Edi Rama.
Shehaj e cilësoi dhunën shtetërore si shenjë paniku të qeverisë, përballë një lëvizjeje rinore që, sipas tij, nuk mund të vihet më nën kontroll politik.
Të lidhura
None found
Sipas kreut të “Mundësisë”, përpara se policia të ndërhynte për shpërndarjen e protestës, pjesëmarrësit nuk kishin kryer asnjë veprim të dhunshëm. Ai tha: “Sot Edi Rama dha urdhër që të shpërndajë një protestë paqësore. Ne ishim këtu, nuk gjuajti askush me gurë, nuk pati asnjë akt dhune, por në një moment të caktuar kur e pa që po mblidheshin shumë, filloi t’i shtynte dhe t’i largonte me dhunë. Përse? Sepse do të ndalë protestën, sepse do të ndalë ndryshimin, sepse do të ndalë të rinjtë.”
Ai pretendoi se urdhrat për ndërhyrjen policore vijnë nga kreu i qeverisë, i cili, sipas tij, synon të mbajë pushtetin me çdo kusht. “Është Edi Rama që drejton policinë, është Edi Rama që drejton personalisht dhunën kundër protestuesve, mendon se me dhunë do t’ia dalë. I ka bërë llogaritë gabim, sepse kjo rini ka një kurajo të jashtëzakonshme, ka një dëshirë dhe një këmbëngulje që askush nuk e ka parë në këto 30 vitet e fundit”, u shpreh Shehaj.
Duke komentuar vendimin e pedagogëve për të pezulluar mësimin dhe për t’iu bashkuar bojkotit të studentëve, ai u kërkoi atyre të mos kufizohen te shprehja e mbështetjes, por të jenë pranë të rinjve në shesh. “Nuk duhet thjesht të solidarizohen me studentët, duhet të jenë aty bashkë me studentët. Shumë mirë bënë që i u bashkuan sot. Duhet t’i bashkohen jo vetëm në mëngjes, por gjatë gjithë ditës, çdo ditë derisa Edi Rama të largohet”, tha ai.
Shehaj argumentoi se karakteri qytetar dhe jopartiak i protestës është burimi i forcës së saj. “Kjo protestë nuk është një protestë partiake. Nuk është me militantë të cilët janë këtu dhe kërkojnë një vend pune. Janë këtu sepse duan të ndryshojnë Shqipërinë, sepse duan të rrëzojnë një klasë politike të korruptuar që ua ka bërë jetën të pamundur prindërve të tyre. Edi Rama do të detyrohet të largohet dhe duhet të japë dorëheqjen sa më shpejt, pa kushte”, përfundoi ai.
