Vendimet që merren sot janë themeli mbi të cilin do të ndërtohet Kosova e vitit 2050.
Ekspertë nga Kosova dhe vende të tjera, përfaqësues të institucioneve, akademikë, oda profesionale dhe partnerë zhvillimorë u mblodhën në Simpoziumin Ndërkombëtar “Vizioni Hapësinor i Kosovës 2050”. Ky aktivitet u organizua për herë të parë në Kosovë në një nivel të tillë dhe kishte për synim krijimin e një qasjeje të përbashkët për zhvillimin territorial të vendit.
Të lidhura
None found
Një pjesë e rëndësishme e diskutimeve iu kushtua rritjes së pakontrolluar urbane, ruajtjes së tokave bujqësore, mbrojtjes së hapësirave të gjelbra dhe domosdoshmërisë për një zhvillim të qëndrueshëm, në përputhje me kërkesat e mjedisit.
Ministrja e Mjedisit dhe Planifikimit Hapësinor, Fitore Pacolli, tha se duhet kaluar nga hartimi formal i planeve në zbatimin e tyre konkret. Sipas saj, sfidat e trashëguara dhe ndryshimet në nevojat demografike kërkojnë planifikim më të përgjegjshëm, afatgjatë dhe gjithëpërfshirës.
Vizioni Hapësinor i Kosovës 2050 synon të shërbejë si bazë për një zhvillim të strukturuar, infrastrukturë funksionale, qytete më të përshtatshme për jetesë dhe mbrojtje më efikase të pasurive natyrore.
Ndërtimi i Kosovës së vitit 2050 nis me përgjegjësinë e treguar në të tashmen. Përmes një drejtimi të qartë, planifikimit afatgjatë dhe zbatimit të qëndrueshëm, zhvillimi mund të ecë së bashku me mbrojtjen e mjedisit dhe rritjen e mirëqenies së qytetarëve.
Simpoziumi u organizua nga Ministria e Mjedisit dhe Planifikimit Hapësinor, me mbështetjen e Qeverisë Gjermane dhe Qeverisë Zvicerane, përmes GIZ Kosova.
