Ministria e Administrimit të Pushtetit Lokal (MAPL) po vijon konsultimet me komunat dhe partnerët ndërkombëtarë në kuadër të përgatitjes së Strategjisë së Vetëqeverisjes Lokale 2027–2031.
Të lidhura
None found
Në takimin e radhës, zëvendësministri Agon Batusha, përfaqësuesit e komunave dhe ata të OSBE-së diskutuan për çështje që lidhen me përparimin e qeverisjes lokale. Në fokus ishin forcimi i demokracisë në nivel lokal, rritja e transparencës dhe llogaridhënies, garantimi i gjithëpërfshirjes dhe përmirësimi i performancës së komunave.
Pjesëmarrësit nënvizuan se strategjia duhet të hartohet mbi bazën e nevojave dhe vështirësive konkrete të komunave. Për këtë qëllim, dokumenti pritet të përcaktojë objektiva të qarta, masa të zbatueshme dhe mekanizma funksionalë për realizimin e tyre.
Gjatë diskutimeve u vu theksi edhe te forcimi i kapaciteteve institucionale dhe profesionale të komunave, si dhe te përfshirja më aktive e qytetarëve në proceset e marrjes së vendimeve.
Strategjia e Vetëqeverisjes Lokale 2027–2031 synon të shërbejë si bazë e qëndrueshme për një qeverisje lokale më efikase, transparente dhe llogaridhënëse, duke ndihmuar në përmirësimin e shërbimeve publike dhe në adresimin e nevojave të qytetarëve.
MAPL ka deklaruar se do të vijojë bashkëpunimin me komunat dhe partnerët për të garantuar një proces gjithëpërfshirës hartimi, i cili do të përfshijë politika dhe masa konkrete në mbështetje të zhvillimit dhe fuqizimit të qeverisjes lokale.
