Kryeministri Albin Kurti deklaroi se Qeveria e Kosovës do të vijojë të mbështesë shqiptarët e Preshevës, Medvegjës dhe Bujanocit në nivel politik, si dhe përmes ndihmës materiale e financiare.
Të lidhura
None found
Pas përfundimit të seancës së Kuvendit, Kurti vlerësoi bashkimin e subjekteve shqiptare në zgjedhjet e jashtëzakonshme që do të zhvillohen në Serbi. Sipas tij, shqiptarët do të garojnë përmes një liste të përbashkët të quajtur “Koalicioni Shqiptar”.
“Mbështetja jonë për shqiptarët në Preshevë, Medvegjë dhe Bujanoc është e dyfishtë, politike dhe materiale-financiare. Ne synojmë që të respektohen të drejtat e tyre kombëtare, qytetare dhe njerëzore, ndërsa me përfaqësuesit e tyre mbajmë kontakte të vazhdueshme. E mirëpresim faktin që në zgjedhjet në Serbi do të paraqiten me një subjekt të përbashkët, ‘Koalicionin Shqiptar’, dhe u urojmë suksese, pasi diskriminimi ndaj shqiptarëve është i jashtëzakonshëm”, deklaroi Kurti.
Kryeministri solli gjithashtu shembuj të përfaqësimit të ulët të shqiptarëve në institucionet e Luginës. Ai tha se gjatë dekadës së fundit nuk është punësuar asnjë polic i ri shqiptar, ndërsa në Spitalin e Vranjës, nga më shumë se 1 mijë e 300 të punësuar, vetëm 2 janë mjekë shqiptarë.
“Që prej vitit 2016, për 10 vjet, në Preshevë, Medvegjë dhe Bujanoc nuk është pranuar në punë asnjë polic i ri shqiptar. Ndërkohë, nga mbi 1 mijë e 300 punonjësit e Spitalit të Vranjës, vetëm 2 mjekë janë shqiptarë. Atje nevojitet shumë punë për të korrigjuar padrejtësitë dhe për t’u garantuar shqiptarëve të drejtat që u takojnë”, u shpreh Kurti.
Mbështetja për Luginën e Preshevës synon financimin e projekteve dhe programeve që përmirësojnë pozitën e shqiptarëve, si dhe ruajtjen e gjuhës, kulturës dhe identitetit shqiptar në Preshevë, Bujanoc dhe Medvegjë.
Ky vendim bazohet në memorandumin e bashkëpunimit të nënshkruar ndërmjet Qeverisë së Kosovës dhe Këshillit Kombëtar Shqiptar.
