Egnatia do ta zhvillojë në “Elbasan Arena” përballjen me Midtjylland, e cila fillimisht ishte planifikuar të luhej në “Air Albania”. UEFA vendosi ndryshimin e stadiumit për shkak të shqetësimeve për sigurinë, të lidhura me protestat masive të studentëve që po zhvillohen në Tiranë.
Të lidhura
None found
Vendimi u mor vetëm disa orë përpara daljes së skuadrave në fushë. Në reagimin e saj, FSHF bëri të ditur se takimi i fazës së ligës të UEFA Conference League do të zhvillohet në Elbasan, ndërsa protestat në kryeqytet vazhdojnë prej ditësh.
Sipas sqarimit të federatës, orari i nisjes mbetet 18:45 dhe i vetmi ndryshim në organizimin e ndeshjes është stadiumi pritës.
Pas rezultateve të suksesshme në fazat kualifikuese, kampionët e Shqipërisë hapin me këtë takim rrugëtimin e tyre historik në fazën e ligës të UEFA Conference League.
Debutimi në këtë fazë të kompeticionit do ta vendosë Egnatian përballë skuadrës daneze të Midtjylland. Për ekipin rrogozhinas, kjo përballje përbën një tjetër moment me rëndësi në përpjekjen për ta përfaqësuar denjësisht futbollin shqiptar në arenën europiane.
