Emri i Min-jae Kim është përfshirë në diskutimet e Arsenalit për merkaton. Gazeta gjermane Bild raporton se klubi londinez po vlerëson mundësinë për të afruar qendërmbrojtësin e Bayern Munichut.
Të lidhura
None found
Nismën brenda klubit e ka marrë Maurizio Micheli, drejtuesi i skautëve të “Topçinjve”, i cili ka propozuar transferimin e futbollistit nga Koreja e Jugut. Sipas të njëjtit burim, realizimi i këtij operacioni në afatin kalimtar të janarit shihet si pak i mundshëm, por interesimi mund të marrë formë konkrete më vonë.
Për Michelin, Kim është një futbollist i njohur nga periudha kur italiani punonte te Napoli. Ishte pikërisht ai që mundësoi kalimin e mbrojtësit nga Fenerbahçe në vitin 2022 për 19 milionë euro. Një vit pas atij transferimi, Bayern Munichu pagoi 50 milionë euro për ta marrë në skuadër.
29-vjeçari është i lidhur me klubin bavarez deri në vitin 2028 dhe, sipas raportimit, drejtuesit e gjigantit gjerman synojnë të hapin së shpejti negociatat për zgjatjen e kontratës. Në renditjen aktuale të qendërmbrojtësve të Bayernit, Kim zë vendin e tretë, pas Dayot Upamecanos dhe Jonathan Tahut.
Kjo nuk është hera e parë që Arsenali shfaq interes për të. Gjatë verës së kaluar, londinezët i kishin intensifikuar përpjekjet dhe, siç kishte raportuar tz, kishin kontaktuar Bayernin për të mësuar nëse transferimi i tij ishte i mundur. Në atë periudhë, ata po kërkonin një zëvendësues për William Saliban, mungesa e të cilit pas një operacioni në shpinë pritej të ishte e gjatë.
Megjithatë, sipas raportimeve, Kim nuk e pranoi mundësinë për t’u larguar dhe zgjodhi të qëndronte te Bayerni për të konkurruar për vendin e tij. Arsenali më pas siguroi Ezri Konsan nga Aston Villa, në një transferim me vlerë 60 milionë euro.
Në gjashtë paraqitjet zyrtare të këtij sezoni me Bayern Munichun, Kim ka grumbulluar 489 minuta, pa regjistruar as gol dhe as asist.
