Komisioni Qendror i Zgjedhjeve po shqyrton mundësinë që votimi dhe numërimi elektronik të zgjerohet në zgjedhjet vendore të vitit 2027, duke e aplikuar këtë teknologji në disa prej bashkive më të mëdha të vendit.
Në dokumentin që u ka dërguar partive politike, KQZ sqaron se vlerësimi bëhet në kuadër të përgatitjeve për zgjedhjet e ardhshme dhe përpjekjeve për modernizimin e proceseve zgjedhore. Sipas institucionit, po analizohet shtrirja e votimit elektronik në një numër të përcaktuar njësish të qeverisjes vendore.
Të lidhura
None found
KQZ vlerëson se, duke pasur parasysh kërkesat teknike, logjistike e administrative, si dhe domosdoshmërinë e një zbatimi të qëndrueshëm dhe në kohë, aplikimi i votimit dhe numërimit elektronik në 3 ose 4 bashki të mëdha do të ishte një zgjidhje e arsyeshme dhe proporcionale.
Institucioni nënvizon se zgjerimi i këtij mekanizmi nuk mund të vendoset pa një pozicion të qartë dhe të unifikuar nga partitë politike.
Për këtë arsye, partive u është kërkuar të deklarojnë qëndrimin e tyre për zhvillimin e votimit dhe numërimit elektronik në disa bashki të mëdha gjatë zgjedhjeve vendore të vitit 2027.
Si hap paraprak, KQZ u ka kërkuar forcave politike të caktojnë përfaqësues për një takim konsultues që do të mbahet në ambientet e Komisionit Qendror të Zgjedhjeve.
Takimi do të zhvillohet të premten, më 9 tetor 2026, në orën 11:30.
Partitë duhet të konfirmojnë pjesëmarrjen e përfaqësuesve të tyre nëpërmjet adresës zyrtare të postës elektronike të KQZ-së.
Ky konsultim është pjesë e përgatitjeve të hershme për zgjedhjet vendore të vitit 2027. Vendimi përfundimtar për numrin e bashkive ku do të përdoren votimi dhe numërimi elektronik do të varet nga vlerësimi teknik e administrativ i procesit dhe nga qëndrimi i partive politike.
