Prokuroria Themelore Publike e Manastirit ka ngritur aktakuzë ndaj pesë internistëve të Spitalit Klinik të Manastirit “Dr. Trifun Panovski”, të cilët akuzohen për “Krime të rënda kundër shëndetit të njeriut”, njoftoi Prokuroria Publike, transmeton Telegrafi Maqedoni.
Të lidhura
None found
Sipas aktakuzës, mjekët kanë trajtuar në mënyrë neglizhente një paciente 40-vjeçare gjatë periudhës 28.05.2024-04.06.2024, në repartin e mjekësisë interne. Prokuroria vlerëson se veprimet e tyre çuan në përkeqësimin e gjendjes shëndetësore të pacientes dhe, më pas, në vdekjen e saj.
Gruaja ishte paraqitur në spital pas një kontrolli dhe rekomandimit nga mjeku i kujdesit parësor, i cili kishte ngritur dyshime për inflamacion të venave, përkatësisht tromboflebit. Megjithatë, gjatë vlerësimit fillestar në repartin e mjekësisë interne, pa u marrë një anamnezë e plotë dhe pa u kryer analiza të detajuara, asaj iu vendos diagnoza e artritit reumatoid. Pas marrjes së terapisë, pacientja u dërgua në shtëpi.
Si pasojë e kësaj, tromboza nuk u identifikua dhe nuk u diagnostikua në kohën e duhur. Gjithashtu, nuk u aplikua trajtimi i nevojshëm për këtë gjendje, çka, sipas Prokurorisë, i hoqi pacientes mundësinë reale për zbulimin dhe mjekimin në kohë të procesit trombotik, si dhe për parandalimin ose kufizimin e përparimit të tij.
Më 01.06.2024, për shkak të dhimbjeve të forta në bark dhe përkeqësimit të gjendjes së përgjithshme, pacientja u kthye në spital për kontroll. Edhe pse u shtrua, gjatë katër ditëve pasuese mjekët kujdestarë nuk kryen ekzaminime të tjera diagnostikuese për të përcaktuar shkakun e gjendjes dhe terapinë e përshtatshme, pavarësisht rezultateve jonormale të analizave laboratorike dhe biokimike.
Gjendja e saj vijoi të rëndohej dhe, pasditen e 04.06.2024, ajo kërkoi ndihmë në një klinikë private në Shkup. Atje u pranua në gjendje të rëndë. Gjatë një operacioni urgjent u konstatua trombozë e arterieve mezenterike të sipërme dhe të poshtme, e shoqëruar me gangrenë të plotë të zorrës së hollë dhe zorrës së trashë. Gjendja ishte e paoperueshme dhe pacientja ndërroi jetë më 05.06.2024, bëri të ditur PTHP./Telegrafi/
