Palët në çështjen ndaj Hashim Thaçit, Kadri Veselit, Rexhep Selimit dhe Jakup Krasniqit kanë afat deri më 27 nëntor 2026 për të paraqitur njoftimet e apelit kundër aktgjykimit. Afatin e ri e ka caktuar Paneli i Gjykatës së Apelit në Dhomat e Specializuara të Kosovës.
Të lidhura
None found
Në njoftimin zyrtar të publikuar më 29 shtator thuhet se Paneli e ka pranuar pjesërisht kërkesën e ekipeve të mbrojtjes për më shumë kohë. I njëjti afat vlen edhe për Zyrën e Prokurorit të Specializuar, ndaj të dyja palët mund të njoftojnë deri atëherë se cilat pjesë të aktgjykimit synojnë të kundërshtojnë.
Zgjatja e afatit është një hap procedural: ajo nuk do të thotë se është pranuar ndonjë apel dhe nuk ndryshon dënimet e dhëna në shkallën e parë. Aktgjykimi nuk është ende i formës së prerë.
Më 16 shtator 2026, Trupi Gjykues dënoi Hashim Thaçin dhe Jakup Krasniqin me nga 25 vjet burgim, Kadri Veselin me 18 vjet dhe Rexhep Selimin me 13 vjet. Të katër u shpallën fajtorë për krime lufte, përfshirë ndalim arbitrar, trajtim mizor, torturë dhe vrasje, ndërsa u shpallën të pafajshëm për akuzat për krime kundër njerëzimit.
Paneli i Apelit përbëhet nga gjyqtarët Michèle Picard, Kai Ambos dhe Nina Jørgensen. Në një vendim tjetër të marrë po më 29 shtator, ai përcaktoi edhe mënyrën se si viktimat do të marrin pjesë në procedurën e apelit. Sipas Gjykatës, do të ndiqet një sistem i ngjashëm me atë të gjykimit në shkallën e parë, i përshtatur për fazën e apelit.
Pasi të dorëzohen njoftimet, do të qartësohet se çfarë kundërshtojnë konkretisht mbrojtja dhe Prokuroria, qoftë pjesë të aktgjykimit, përgjegjësinë penale apo lartësinë e dënimeve.
