Një sasi e konsiderueshme e lëndëve narkotike është zbuluar të dielën në pikën e kalimit kufitar në Vërmicë, pas një operacioni të përbashkët mes Doganës dhe Policisë së Kosovës.
Të lidhura
None found
Gjatë kontrollit rutinë të një autobusi që po hynte në vend, zyrtarët doganorë vendosën t’i nënshtrojnë verifikimit fizik si mjetin ashtu edhe bagazhet e udhëtarëve.
Njëri prej pasagjerëve, i pyetur nëse mbartte ndonjë send që duhej raportuar, dha një përgjigje negative.
Mirëpo, inspektimi i çantës së tij personale nxori në pah një qese plastike me përmbajtje të dyshuar si lëndë narkotike. Pas matjes, rezultoi se bëhej fjalë për 2.162 kilogramë marihuanë.
Autobusi u skanua më tej, por nuk u gjetën shkelje të tjera.
Menjëherë u njoftua Policia e Kosovës dhe i dyshuari, së bashku me substancën e sekuestruar, iu dorëzuan autoriteteve përkatëse për procedurat e mëtejshme ligjore.
Dogana e Kosovës rikonfirmoi angazhimin e saj të vazhdueshëm, në bashkërendim me Policinë dhe institucionet e tjera, për të goditur kontrabandën dhe trafikun e drogës, duke synuar mbrojtjen e sigurisë publike dhe interesave shtetërore.
