ZYRTARE/ Edhe Turqia ka një datë për rifillim e kampionatit

Presidenti i Federatës së Futbollit të Turqisë, Nihat Ozdemir, ka konfirmuar lajmin se Superliga turke do të rinisë më 12 qershor, rreth tre muaj pas pezullimit.

Ndeshjet e fundit në Turqi u zhvilluan më 18 mars, por tashmë presidenti i Federatës së Futbollit të Turqisë ka bërë të ditur se do të rikthehet futbolli në vend.

“Ne po e përjetojmë njërën ndër periudhat më sfiduese në histori të njerëzimit. Epidemia e koronavirusit që nisi në Kinë tani e ka rrethuar botën dhe vazhdojë të jetë efektive edhe pas 5 muajsh.”

“Për momentin ne kemi vendosur t’i rinisim sezonet e pezulluara në Superligë, TFF Ligën e Parë, Ligën e Dytë, Ligën e Tretë dhe Ligën Amatore Regjionale në javën e 12, 13 dhe 14 qershorit, edhe pse kemi edhe skenarë të tjerë”.

“Shpresoj që do t’i përfundojmë ligat tona në mënyrën më të mirë të mundshme në fund të korrikut, që do t’i ndajmë trofetë në fushën e lojës dhe do ta mbyllim sezonin duke e organizuar finalen e Ligës së Kampionëve në gusht”, thuhet në deklaratën e lëshuar nga Ozdemir.