Lojtarët kanë dhënë maksimumin, flet Egbo: Në këtë fazë na hynin shumë në punë 3 pikët

Trajneri i Tiranës, Emanuel Egbo ka folur pas fitores me rezultatin 2-0 ndaj Flamurtarit në transfertë. Numri një i stolit në prononcimin për “SuperSport” u shpreh se është i kënaqur me lojtarët e tij.

“Në këtë fazë që është kampionati na hynin shumë në punë 3 pikët, sesa loja e bukur. E kam menduar që kjo ndeshje mund të shkonte kështu. Vinim nga derbi me Partizanin dhe nga sfida me Kukësin. Lojtarët ishin pak të lodhje. Disa lojtarë kanë qenë pa qejf. E rëndësishme është që morëm 3 pikë. Nuk merrem me ndeshjet e kundërshtarëve. Vazhdoj të merrem me ekipin tim. Nuk na hyn në punë çfarë bëjnë kundërshtarët.

Halilin nuk e pashë që ka dalë i mërzitur. Nuk besoj që mund të jetë i mërzitur. I kemi dhënë minuta. Kanë qenë shumë mungesa. Ai duhet ta tregojë veten. Ashtu dhe lojtarët e tjerë. Janë përpjekur të japin 100%. Ishte e mjaftueshme për të marrë 3 pikë.

Të rëndësishme janë 3 pikë. Kampionati është në sprintin e fundit. Nuk mund të hyjmë në aventurë. Kishim mungesa. Muçi ka treguar pak gjëra sot. Më mirë mund të luante si sulmues se sa 10-ç. Jam i kënaqur me lojtarët. E rëndësishme është si lojtarët e kanë përballuar ndeshjet. Të gjithë duhet të jenë gati. Kanë dhënë maksimumin e mundshëm.

Ne luajmë me 4-2-3-1. Filloi Sidibe me Bathën. Kur çova Bathën sipër, futa Karabecin në rolin natyral. Kemi menduar gjithmonë për të mirën e ekipit, jo të idividit. Mendojmë gjithmonë për të mirën e ekipit.

Jam njeri optimist dhe pozitiv, nuk e kam menduar asnjëherë humbjen. Rezultati nuk është në dorën time. E ka Zoti në dorë, ne thjesht duhet të japim 100%. Ai e di që kemi besim te ai. Çdo njeri që ka besim te Zoti, ia del.

Emri im është Emanuel dhe thotë Zoti me ne. Në sezonet e tjera ka qenë trajner tjetër. Nuk e kuptoni dot besimin te Zoti në qoftë se nuk besoni. Kanë shumë gjëra pozitive që kanë ndryshuar. Ekipi është bërë harmonik, jemi të gjithë si vëllezër. Është normale që hiri i Zotit do jetë me ne”, u shpreh Egbo.