Koronavirusi e ka përshtatur më shpejt Kahn me rolin e ri

Oliver Kahn, legjenda e portës bavareze dhe kombëtares gjermane, i cili nga muaji janar është pjesë e bordit ekzekutiv të Bayernit tw Mynihut, thekson se kjo periudhë sjell ndjesi të ndryshme, por veçanërisht ka qenë shumë e nevojshme për të. Ish-kampionit të Europës në portën e Bayernit kjo periudhë pandemie i ka shërbyer për t’u njohur më mirë me detyrat e tij si anëtar i bordit drejtues, pavarësisht se emocionet janë të ndryshme.

Në një intervistë të dhënë në kanalin zyrtar të klubit në Youtube, Kahn theksoi se “një krizë si kjo shton ritmin për diçka tjetër, që do të thotë se unë jam përshtatur më shpejt me argumentet e situatës dhe klubin”.

Këtë fundjavë, Bayerni do të luajë në transfertë ndaj Union Berlinit, teksa sytë e të gjithë botës janë pikërisht tek rinisja e Bundesligës. Për Oliver Kahn “rifillimi i kampionatit është një mundësi e mirë, por edhe një sfidë”, pasi, sipas tij, “të gjithë aktorët, që duhet të zbresin në fushë në Bundesligë, pa diskutim kanë paqartësi dhe ndjesi të ndryshme. Askush nuk stepet, por të gjithë dëshirojnë të luajnë futboll dhe në një situatë të tillë të tërë e kuptojnë se çfarë do të thotë kjo”.