Ministria e Mbrojtjes: Në Akademinë Ushtarake aplikuan vetëm dy shqiptarë, njëri u tërhoq dhe tjetri u rendit i 43-ti

Ministria e Mbrojtjes iu përgjigj kritikave të BDI-së për mungesën e kandidatëve shqiptarë të pranuar në Akademinë Ushtarake këtë vit, duke thënë se arsyeja lidhet me numrin e vogël të aplikuesve.

Sipas institucionit, në konkurs morën pjesë vetëm dy kandidatë shqiptarë. Njëri u largua nga gara, kurse tjetri u rendit në vendin e 43-të.

Reagimi erdhi pasi BDI ngriti shqetësimin se Akademia Ushtarake nuk ka pranuar asnjë kadet shqiptar për herë të parë që nga viti 1995.

BDI e cilësoi këtë si cenim të parimit të përfaqësimit të drejtë dhe adekuat të shqiptarëve në institucionet shtetërore, ndërsa kritikoi Qeverinë dhe përfaqësuesit e koalicionit VLEN.

Përplasja mes palëve ka risjellë në vëmendje debatin për përfaqësimin e shqiptarëve në institucionet e sigurisë dhe të mbrojtjes, si edhe për zbatimin e parimeve të Marrëveshjes së Ohrit.