Bundesliga gati të fillojë më 9 maj

Bundesliga do të ishte e gatshme të rifillojë më 9 maj, ka thënë CEO i DFL, Christian Seifert, por gjithçka varet nga kur qeveria do të jap dritën e gjelbër.

Në konferencën e sotme, Seifert tregoi planet që janë vendosur për rinisjen e garës, duke përfshirë edhe luajtjen pas dyerve të mbyllura me një maksimum prej 213 personash brenda stadiumit dhe 109 jashtë.

“Ne nuk kemi përcaktuar një datë, pasi nuk është në dorën tonë nëse kthehemi ose kur kthehemi. Kemi disa opsione. 1 maji nuk është më një datë real. Nëse sinjali jepet gjatë javës tjetër, atëherë mund të jetë 9 maji”.

“Sidoqoftë, do të ishte mendjemadhësi nga ne që të caktonim një datë. E gjitha varet nga ajo kur vendosin politikanët. Nëse është 9 maji, atëherë do të ishim gati atëherë. Nëse është më vonë, ne do të jemi gati edhe në atë datë”, ka thënë ai.

Lojtarët e Bundesligës do të kenë teste rigoroze për COVID-19 si dhe çdo efekt tjetër të mundshëm.

Ekziston edhe një fond solidariteti prej 7.5 milionë euro nga klubet që luajnë në Ligën e Kampionëve, të cilat do të shpërndahet në mesin e 19 klubeve në kategorinë e tretë dhe divizionin e femrave.