Reforma Zgjedhore bashkon katër përfaqësuesit: Për çfarë ranë sot dakord palët

Në takimin e radhës së Reformës Zgjedhore, katër përfaqësuesit kanë rënë dakord për identifikimin dhe votimin elektronik të zgjedhësve, që u propozua nga PD.

Bashkëkryetari i Komisionit për Reformën Zgjedhore Damian Gjiknuri ka deklaruar në përfundim të mbledhjes se nuk përjashtohet numërimi elektronik për shkak se ajo do të ndikojë edhe depolitizimin e komisionerëve.

“Kemi qenë dakord që të përfshihet teknologjia në zgjedhje. Ne do të konsultohemi dhe me ekspertë dhe do të shohim si do ta përfshijmë këtë teknologji. Kjo është qasja që ka mazhoranca dhe qeveria.

Nëse kjo është e realizueshme do bëjmë konsultimet e nevojshme por në parim, ka qenë që parimet t’i vendosim në ligj. Një nga qëllimet që ne kemi pasur është edhe depolitizim i Komisioneve Zgjedhore dhe teknologjia ndihmon në këtë proces.

Ditën e martë PD do sjellë propozimet e saj për çështjet e financimit të fushatave. Nëse PD do i sjellë të gjitha propozimet besoj se në 2 javët e mbetura do kemi rezultate. Prokuroria ka sjellë disa përgjigje. Ne kemi rënë dakord që krimet zgjedhore të hetohen nga SPAK.

Kemi rëndë dakord që roli i policisë të jetë sinjalizuese. Ky është një proces që po trajtohet nga ekspertët. Ne jemi të gatshëm të ketë edhe një mbikëqyrje më të thellë të proceseve zgjedhore. Mazhoranca nuk ka asgjë kundër”, tha Gjiknuri.

Një tjetër pikë për të cilën u ra dakord në parim, ishte dhe propozimi i Rudina Hajdarit, për pastërtinë e figurës së kandidatëve për deputetë, që sipas saj nuk duhet të kenë asnjë lidhje me vendimmarrje në kohën e komunizmit.