OFL vazhdon misionin, kush janë dy emrat që morën sot “letrën”

Dy subjekte të tjera të paketës anti-KÇK janë bërë sot publike nga OFL, që të deklarojnë pasurinë e tyre brenda 48 orësh.

Operacioni Forca e Ligjit iu ka dërguar kërkesë për të deklaruar pasurinë dy personazheve të njohura në Berat, njeri i denuar për prostitucion dhe tjetri per trafik narkotikësh në Itali.

Mësohet se bëhet fjalë për shtetasit Gazmend Mahmutaj, dhe Edison Çobo.

Njoftimi i policisë
OFL, 18 shkurt

Në zbatim të detyrave të përcaktuara në Aktin Normativ të datës 31 janar 2020, vijon operacioni Forca e Ligjit, në bashkëpunim me strukturat vendore të Policisë, për dërgimin e kërkesave për vetëdeklarim të pasurisë.

Në këtë kuadër, OFL u ka dërguar kërkesat për vetëdeklarim të pasurisë shtetasve:

G. M., banues në Berat, i dënuar në Itali për “Trafikim të lëndëve narkotike”;

E. Ç., banues në Berat, i dënuar në Itali për “Trafikim të lëndëve narkotike”;

Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së.

Më pas, përgjigjet e marra do t’i dërgohen SPAK-ut, për veprime të mëtejshme.

OFL është në veprim të pandërprerë dhe në kryerje të veprimeve komplekse, për të evidentuar dhe dërguar në SPAK, të gjithë personat që janë subjekt i Ligjit Special.

OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.