Mjeku shqiptar e pranon hapur: Mundësia që të hyjë koronavirusi në Shqipëri është e madhe

Mjeku infeksionist Pëllumb Pipero ishte i ftuar së fundmi në emisionin “Historia ime” në “TV Klan”, prej ku foli për koronavirusin dhe theksoi se mundësia që të hyjë në Shqipëri është e madhe.

“Ndjejmë një lloj paniku në qytetarët, kjo ndjehet përditë. Ne shohim qoftë jo vetëm përmes kujdesit, por edhe vrapit për të blerë maska, për të blerë detergjentë, për të blerë maska, për të blerë dezinfektantë.

Ndjejmë një lloj shqetësimi midis bluzave të bardha, ndjejmë shumë angazhim nga autoritetet drejtuese, qofshin ato shëndetësore, qofshin edhe tek shërbimi ynë. Fakt deri tani është se nuk kemi asnjë rast të konfirmuar, kemi pasur 12 ose 13 raste të dyshuar, të cilët janë analizuar në Institutin e Shëndetit Publik dhe kanë rezultuar negativ.

Jemi në periudhën e gripit stinor dhe ne kemi 160-170 vizita çdo ditë, midis të cilëve 40-50 janë me sindromë gripale, ku më shumë dhe ku më pak. Sa kohë rreth këtij virusi misterioz ka shumë të panjohura dhe klinika është e ngjashme si dy pika uji në fillimet e saj me gripin stinor, natyrisht që kujdesi është i shtuar.

Por dua të them se vend për panik nuk ka. Ajo që dua të them është se deri dje, konsideroheshim dhe ishim vend me risk të ulët, tani nuk jemi vend me risk të ulët sepse e kemi rreth e qark kufijve tanë dhe mundësia për të hyrë është e madhe, ndoshta punë ditësh, ndoshta punë javësh, gjë që nuk e dëshirojmë, por nuk i shpëtojmë”.

Mirela Milori: Mendoni se është çështje ditësh doktor?

Pëllumb Pipero: Unë mendoj si mjek i vjetër, që nuk është çudi të jetë punë ditësh, punë orësh, punë javësh. /albeu.com/