Iku nga Tirana për t’i shpëtuar COVID-19, gruaja e infektuar shkon në fshat e s’lë njeri pa takuar

Berati iu shtua sot hartës me të infektuar nga koronavirusi. 44-vjeçarja e konfirmuar me Covid-19 jetonte dhe punonte prej vitesh në Tiranë, ndërsa punonte edhe në Durrës si fizioterapiste.

Ndërsa pas mbylljes së shumë bizneseve, rreth 10 ditë më parë është kthyer të jetonte në ish-banesën e saj në fshatin Rroshnik të Beratit, së bashku me bashkëshortin dhe djalin e saj, si vend më i sigurt për tu ruajtur nga koronavirusi.

Pas analizave të kryera, pasi ajo ka deklaruar se kishte shenja të virusit, sot ka ardhur dhe konfirmimi se 44-vjeçarja ka rezultuar pozitive.

Menjëherë pas konfirmimit, në banesën e saj në fshatin Roshnik, kanë shkuar punonjësit e shërbimit të higjienës dhe forcat e policisë për të bërë karantinimin e banesës dhe dezifektimin e saj, raporton “Abc”.

Mësohet se 44-vjecarja me inicialet K.M., ka ardhur në këtë fshat 10 ditë më parë ndërsa ka qenë në lëvizje të vazhdueshme dhe është takuar me njerëz brenda këtyre ditëve, jo vetëm në fshat por edhe në qytetin e Beratit.

Deri më tani në Shqipëri kanë humbur jetën nga koronavirusi 5 persona, ndërsa në total rezultojnë të prekur 123.