Dialog me Ramën? Habit Basha: Nuk kam qenë asnjëherë kundër

Kryetari i Partisë Demokratike, Lulzim Basha është shprehur i hapur për dialog me kryeministrin, Edi Rama gjatë intervistë së dhënë për “Euronews Albania” dhe ka deklaruar se nuk ka qenë kurrë pengesë.

Basha u shpreh se qëndrimi i tyre ka qenë konstruktiv duke lënë pas përplasjet politike.

“Nuk kam qenë asnjëherë kundër apo pengesë. Por problemi qëndron diku tjetër. Propozimet tona shihen si të armikut, kundërshtohen ende pa u bërë të ditura dhe nga ana tjetër disa ditë më pas i miratojnë”, tha Basha.

Nga ana tjetër, kreu i PD vuri theksin tek fakti se, pavarësisht se Shqipëria nuk është prekur masivisht nga koronavirusi, kriza ekonomike pas saj që mund të vijë nga masat kufizuese mund të vrasë më shumë njerëz se sa vetë virusi.

“Përpara gjithë shqiptarëve kërkoj mos të humbasë më kohë. Është e pafalshme që dy jave pas paketës së parë ende nuk është zbatuar. Më shumë se sa virusi mund të na vrasë kriza ekonomike.

Propozimet tona kanë qenë konstruktive dhe i kemi ikur debatit dhe përplasjes politike kur dhe nga pala tjetër nuk ka munguar”, u shpreh z. Basha gjatë intervistës në ‘Ilva Now’.

Por, nga ana tjetër z. Basha kërkoi që të bëhet transparencë për tenderët e fundit të Ministrisë së Mbrojtjes për të cilët PD ka bërë kallëzim në SPAK ndaj ministres, OIta Xhaçka.

“Në çdo skenar shpërdorimi apo dyshimi për shpërdorimi ne parave të shqiptarëve është e rëndë. imagjinoni se sa e rëndë është kur vendi është i izoluar”, u shpreh ai.