A e mendon dorëheqjen nga Presidenca? Përgjigjet hapur Meta

Meta deklaroi se nuk e mendon aspak lënin e postit së Presidentit.

Ai tha publikisht në emisionin “Opinion” se nëse ikte, do të kishte cënim të interesave kombëtare.

“Unë të jap dorëheqjen? Pse të jap dorëheqje? Që të çohen ca trima dhe të luajnë me interesat kombëtare? Të iki unë dhe të bëhet Baton Haxhiu president?”, tha kreu i shtetit.

Meta shpjegoi edhe arsyet që vendosi të thërrasë popullin në protestë. Ai i mëshoi fort faktit se institucionet nuk funksionojnë. Ndaj ka thirrur popullin në 2 mars, në atë që ai e cilëson si manifestimin më të bukur.

“Institucionet nuk funksionojnë. Presidenti i ka bërë të gjithë gjërat si zyrtar serioz. Çfarë të bëjë presidenti kur Parlamenti, KED dhe qeveria bëjnë puç kundër presidentit, nuk mund të pushtohet me grusht shteti presidenti.

Nëse shqiptarët thonë se duke pritur e duke fjetur e duke parë telenovela do vijë ndonjë mrekulli… unë tani e kam të qartë se populli do të vendosë legjitimitetin.

Në 2 mars do ndodhë manifestimi më i bukur, ku qytetarët do të dalin për legjitimitetin. Janë të ftuar të gjitha partitë”, tha Meta.